3I ATLAS ಈ ಪದ ಎಲ್ಲೆಡೆ ಗಮನಸೆಳೆಯುತ್ತಿರುವುದು ಏಕೆ? ಇದು ಅಸಲಿಗೆ ಧೂಮಕೇತುನಾ…ಅಥವಾ ಅಥವಾ ಇನ್ನೇನು?

3I ATLAS, ಸದ್ಯ ಜಗತ್ತಿನಾದ್ಯಂತ ಎಲ್ಲರ ಗಮನಸೆಳೆಯುತ್ತಿದೆ. ಅದರಲ್ಲೂ ಖಗೋಳ ವಿಜ್ಜಾನಿಗಳಂತೂ ಹಗಲು ರಾತ್ರಿ ನಿದ್ದೆಗೆಟ್ಟು ಕುತೂಹಲದಿಂದ ಇದರ ಹಿಂದೆಯೇ ಬಿದ್ದಿದ್ದಾರೆ. ಅಷ್ಟಕ್ಕೂ ಇದು ಏನು? ಇದಕ್ಕೆ ಈ ಹೆಸರು ಬರಲು ಕಾರಣವೇನು ಹಾಗೂ ಎಲ್ಲಕ್ಕಿಂತ ಮುಖ್ಯವಾಗಿ ಇದು ಯಾವ ಕಾರಣದಿಂದಾಗಿ ಎಲ್ಲರ ಗಮನ ಸೆಳೆಯುತ್ತಿದೆ?

ಮೊದಲಿಗೆ…

ನಮಗೆಲ್ಲರಿಗೂ ಗೊತ್ತಿರುವ ಹಾಗೆ ನಾವು ಅಂದರೆ ನಮ್ಮ ಭೂಮಿ ಎಂಬ ಗೃಹವು ಆಕಾಶಗಂಗಾ ಅಥವಾ ಮಿಲ್ಕಿವೇ ಎಂಬ ಗ್ಯಾಲಕ್ಸಿಯಲ್ಲಿದೆ. ನಮ್ಮ ಕಣ್ಣಿಗೆ ಅಂದರೆ ಅತ್ಯಾಧುನಿಕ ತಂತ್ರಜ್ಜಾನ ಚಾಲಿತ ಟೆಲಿಸ್ಕೋಪ್ ಮೂಲಕ ಗೋಚರವಾಗಬಹುದಾದ ಅನಂತ ಆಕಾಶದಲ್ಲಿ ಸಾವಿರಾರು ಗ್ಯಾಲಕ್ಸಿಗಳಿವೆ.

ಅಂತಹ ಒಂದು ಗ್ಯಾಲಕ್ಸಿ ಅಂದರೆ ನಮ್ಮ ಸೌರಮಂಡಲವಿರುವ ಗ್ಯಾಲಕ್ಸಿ ಆಕಶಗಂಗೆಯಾಗಿದೆ. ಇನ್ನು ಈ ಆಕಾಶಗಂಗೆಯಲ್ಲಿ ಅದೆಷ್ಟೋ ಸೌರಮಂಡಲಗಳಿವೆ. ನಾವಿರುವ ಸೌರಮಂಡಲದ ಮಧ್ಯದ ಅಗಾಧ ಶಕ್ತಿಯೇ ಸೂರ್ಯ ನಕ್ಷತ್ರ. ಈ ಸೂರ್ಯನ ಸುತ್ತಲೂ ಎಲಿಪ್ಟಿಕ ಪಥದಲ್ಲಿ ನಮ್ಮ ಭೂಮಿ ಸಹಿತ ಇಲ್ಲಿಯವರೆಗಿನ ಮಂಗಳ, ಗುರು, ಶುಕ್ರ ಸೇರಿದಂತೆ ಎಲ್ಲ ಗ್ರಹಗಳು ಪರಿಕ್ರಮ ಹಾಕುತ್ತಿವೆ.

ಅಂದರೆ, ಸೂರ್ಯನ ಗುರುತ್ವಾಕರ್ಷಣೆಯ ಶಕ್ತಿಯ ಅಡಿಯಲ್ಲಿ ಪೂರ್ವನಿಗದಿತ ಪರಿಕ್ರಮಣ ಪಥದಲ್ಲಿ ಎಲ್ಲ ಗ್ರಹಗಳು ಸುತ್ತುತ್ತಿವೆ. ಈ ಸೌರಮಂಡಲದಲ್ಲಿ ಗ್ರಹಗಳ ಹೊರತಾಗಿ ಇತರೆ ಉಲ್ಕಾ ಪಿಂಡಗಳು, ಹಾಗೂ ಮಾನವನಿರ್ಮಿತ ಆದರೆ ನಾಶವಾಗಿರುವ ಕೃತಕ ಉಪಗ್ರಹಗಳ ತ್ಯಾಜ್ಯ (ಸ್ಪೇಸ್ ಡೆಬ್ರಿಸ್) ಹರಿದಾಡುವುದನ್ನು ನೋಡಬಹುದು.

ಇಂಟರ್ಸ್ಟೆಲ್ಲಾರ್ ಎಂದರೇನು?

ಈ ಮೊದಲೆ ವಿವರಿಸಿದಂತೆ ನಮ್ಮ ಗ್ಯಾಲಕ್ಸಿಯಲ್ಲಿ ಅದೆಷ್ಟೋ ಸೌರಮಂಡಲಗಳಿವೆ. ಹೀಗೆ ಎರಡು ಸೌರಮಂಡಲಗಳ ಗಡಿಗಳ ಮಧ್ಯದಲ್ಲಿ ಇರುವ ಆಕಾಶ ಸ್ಥಳವನ್ನೇ ಇಂಟರ್ಸ್ಟೆಲ್ಲಾರ್ ಸ್ಪೇಸ್ ಎಂದು ಕರೆಯಲಾಗುತ್ತದೆ.

ಅಂದರೆ ಪ್ರಸ್ತುತ ನಮ್ಮ ಸೂರ್ಯನ ಶಕ್ತಿಯು ನಿಗದಿತ ದೂರದವರೆಗೆ ವ್ಯಾಪಿಸಿದ್ದು ನಿರ್ದಿಷ್ಟ ಒಂದು ದೂರದ ಸ್ಥಳದಲ್ಲಿ ಶೂನ್ಯವಾಗಿರುತ್ತದೆ. ಈ ವ್ಯಾಪ್ತಿಯಲ್ಲೇ ನಾವು ನಮ್ಮ ಸೌರಮಂಡಲದೊಳಗಿನ ಎಲ್ಲ ಗ್ರಹಗಳು, ಉಲ್ಕಾಪಿಂಡಗಳು ಸೂರ್ಯನ ಗುರುತ್ವಾಕರ್ಷಣೆಗೆ ಹೊಂದಿಕೊಂಡು ಸುತ್ತುತ್ತಿರುವುದನ್ನು ಕಾಣಬಹುದು.

ಇನ್ನು, ಸೂರ್ಯನ ಶಕ್ತಿ ಶೂನ್ಯವಾಗಿರುವ ಸ್ಥಳದ ಆಚೆ ಹೋದಂತೆ ಅದೆಲ್ಲ ಇಂಟರ್ಸ್ಟೆಲ್ಲಾರ್ ಸ್ಪೇಸ್ ಆಗಿರುತ್ತದೆ. ಇನ್ನು ಧೂಮಕೇತು ಎಂಬುದು ಭೂಮಿ ರಚನೆಯಾದಂತೆ ರಚಿತವಾಗಿರುವ ಘನವಸ್ತುಗಳಾಗಿವೆ. ಅವುಗಳ ಮೇಲ್ಮೈ ಕಲ್ಲು ಬಂಡೆಗಳು, ಧೂಳು, ಕಣಗಳು, ಅನಿಲ, ಮಂಜುಗಡ್ಡೆ ಇತ್ಯಾದಿಗಳಿಂದ ತುಂಬಿರುತ್ತವೆ.

ನಮ್ಮ ಸೌರಮಂಡಲದಲ್ಲೂ ಈ ರೀತಿಯ ಧೂಮಕೇತುಗಳಿದ್ದು ಅವು ಸಹ ಸೂರ್ಯನ ಸುತ್ತ ತಮ್ಮದೆ ಆದ ಪರಿಕ್ರಮಣ ಪಥದಲ್ಲಿ ಪರಿಕ್ರಮಿಸುತ್ತಿವೆ.

ಧೂಮಕೇತು/ಕಾಮೆಟ್

ಈಗ ಧೂಮಕೇತು ಬಗ್ಗೆ ನೀವು ತಿಳಿದಿರುವಿರಿ. ನಮ್ಮ ಸೌರಮಂಡಲದಲ್ಲಿರುವ ಈ ರೀತಿಯ ಧೂಮಕೇತುಗಳು ಸಹ ಪರಿಕ್ರಮಣ ಮಾಡುವಾಗ ಸೂರ್ಯನ ಶಾಖದಿಂದಾಗಿ ಅವುಗಳ ಮಂಜುಗಡ್ಡೆ ಕರಗಿ ಅನಿಲವಾಗುತ್ತದೆ, ಧೂಲಿನ ಕಣಗಳು, ಅನಿಲ ಚದುರಿಹೋಗುತ್ತವೆ.

ಹೀಗೆ ಚದುರಿದ ಅನಿಲ ಆ ಧೂಮಕೇತುವಿನ ಹಿಂದೆ ಬಾಲದಂತೆ ಕಂಡುಬರುವುದರಿಂದ ಅದನ್ನು ಅದರ ಟೇಲ್ ಅಥವಾ ಬಾಲ ಎಂದು ಕರೆಯಲಾಗುತ್ತದೆ. ಇನ್ನು ನಮ್ಮ ಟೆಲಿಸ್ಕೋಪ್ ಗಳ ಮೂಲಕ ಅದನ್ನು ನೋಡಿದಾಗ ಆ ಘನವಸ್ತು ಸೂರ್ಯನ ಹತ್ತಿರ ಬಂದಾಗ ಅದರ ಬಾಲಸಹಿತವಾಗಿ ಅದು ಕಾಮಾ (,) ದಂತೆ ಕಂಡುಬರುವುದರಿಂದ ಅದಕ್ಕೆ ಕಾಮೆಟ್ ಎಂದು ಕರೆಯಲಾಗುತ್ತದೆ.

ಇನ್ನು, ನಮ್ಮ ಸೌರಮಂಡಲದ ಕಾಮೆಟ್ ಗಳು ತಮ್ಮದೆ ಆದ ವಿಶಿಷ್ಟ ಗುಣಲಕ್ಷಣಗಳನ್ನು ಹೊಂದಿದ್ದು ಈ ಗುಣಲಕ್ಷಣಗಳ ಲೆಕ್ಕಾಚಾರದಲ್ಲೇ ಅವುಗಳನ್ನು ಧೂಮಕೇತು ಎಂದು ವರ್ಗೀಕರಿಸಲಾಗಿದೆ. ಅಂದರೆ ಕಾಮೆಟ್ ಗಳು ಇಂತಿಂತಹ ಗುಣ ಲಕ್ಷಣಗಳನ್ನು ಹೊಂದಿರುತ್ತವೆ ಎಂಬುದನ್ನು ಈಗಾಗಲೇ ಖಗೋಳ ವಿಜ್ಜಾನಿಗಳು ಲೆಕ್ಕಾಚಾರ ಮಾಡಿ ಇಟ್ಟುಕೊಂಡಿದ್ದಾರೆ.

ಈ ಗುಣಲಕ್ಷಣಗಳ ಲೆಕ್ಕಾಚಾರದ ಆಧಾರದಡಿಯಲ್ಲೇ ನಮ್ಮ ಭೂಮಿಯ ಸಮೀಪ ಹಾದು ಹೋಗುವ ವಸ್ತುಗಳನ್ನು ಧೂಮಕೇತು ಎಂದು ವರ್ಗೀಕರಿಸಲಾಗುತ್ತದೆ.

3I ATLAS ಒಂದು ಧೂಮಕೇತುನಾ?

ಹಾಗಾದರೆ, ಸದ್ಯ ಎಲ್ಲೆಡೆ ಚರ್ಚೆಯಾಗುತ್ತಿರುವ 3I ATLAS ಒಂದು ಧೂಮಕೇತು ಅಥವಾ ಕಾಮೆಟ್ ಆಗಿದೆಯಾ? ಸಾಮಾನ್ಯವಾದ ಲೆಕ್ಕಾಚಾರದ ಅಡಿಯಲ್ಲಿ ವಿಜ್ಜಾನಿಗಳು ಇದನ್ನು ಕಾಮೆಟ್ ಎಂದೆ ನಂಬಿದ್ದರೂ ಇದು ತೋರಿಸುತ್ತಿರುವ ಕೆಲ ಗುಣಲಕ್ಷಣಗಳು ಮುಂಚೆ ಮಾನ್ಯ ಮಾಡಲಾಗಿರುವ ಧೂಮಕೇತುಗಳ ಲಕ್ಷಣಗಳೊಂದಿಗೆ ಹೊಂದಿಕೊಳ್ಳದೆ ಇರುವುದೇ ಇದರ ಸುತ್ತಲೂ ಕುತೂಹಲ ಹೆಚ್ಚುವಂತೆ ಮಾಡಿದೆ.

ಇದಕ್ಕಿಂತಲೂ ಮುಖ್ಯವಾಗಿ ಇದು ಒಂದು ಇಂಟರ್ಸ್ಟೆಲ್ಲಾರ್ ಅತಿಥಿಯಾಗಿರುವುದು ಸಾಕಷ್ಟು ಕುತೂಹಲ ಕೆರಳಿಸಿದೆ. ಮುಂಚೆ ವಿವರಿಸಿದಂತೆ ಇದು ನಮ್ಮ ಸೌರಮಂಡಲದಾಚೆಯಿಂದ ನಮ್ಮ ಸೌರಮಂಡಲದ ಕಕ್ಷೆಯೊಳಗೆ ಪ್ರವೇಶಿಸಿ ಸಾಗುತ್ತಿದೆ ಹಾಗೂ ಇದು ಕಾಮೆಟ್ ಗಳ ಗುಣಲಕ್ಷಣಗಳನ್ನು ತೋರಿಸುತ್ತಿಲ್ಲ.

ಸಾಮಾನ್ಯವಾಗಿ ನಮ್ಮ ಸೌರಮಂಡಲದ ಕಕ್ಷೆಯೊಳಗೆ ಯಾವುದೇ ವಸ್ತು ಬಂದಾಗ ಅದು ಸೂರ್ಯನ ಅಗಾಧ ಗುರುತ್ವಾಕರ್ಷಣ ಶಕ್ತಿಗೆ ಒಳಗಾಗಿ ಅದರ ಪ್ರಭಾವದಲ್ಲೇ ತನ್ನ ಪಥದಲ್ಲಿ ಮುನ್ನಡೆಯುತ್ತದೆ. ಆದರೆ 3I ATLAS ಹಾಗಿಲ್ಲ, ಇದು ಸೂರ್ಯನ ಶಕ್ತಿಯನ್ನೂ ಮೀರಿ ತನ್ನದೆ ಆದ ಪಥದಲ್ಲಿ ಚಲಿಸುತ್ತಿರುವುದೇ ಸದ್ಯ ವೀಜ್ಜಾನಿಗಳಲ್ಲಿ ಇದರ ಬಗ್ಗೆ ಹಲವು ಗೊಂದಲಗಳುಂಟಾಗುವಂತೆ ಮಾಡಿದೆ.

ಸಾಮಾನಯವಾಗಿ ಸ್ಪೇಸ್ ಶಿಪ್ ಗಳಂತಹ ಗಗನ ನೌಕೆಗಳು ತಮ್ಮದೆ ಆದ ನ್ಯುಕ್ಲಿಯರ್ ಚಾಲಿತ ಶಕ್ತಿ ಬಳಸಿ ಬೇಕಾದ ಪಥದಲ್ಲಿ ಸಾಗಬಹುದು, ಆದರೆ ಆಕಾಶದಲ್ಲಿರುವ ನೈಸರ್ಗಿಕ ವಸ್ತುಗಳು ಹಾಗಲ್ಲ, ಅವು ಸೂರ್ಯನ ಪ್ರಭಾವಕ್ಕೆ ಒಳಗಾಗಿಯೇ ಚಲಿಸುತ್ತವೆ. ಹಾಗಾಗಿ ಕೆಲವರು ಇದನ್ನು ಅನ್ಯಗ್ರಹದ ಗಗನನೌಕೆ, ಇಲ್ಲಿ ಸಮೀಕ್ಷೆ ಮಾಡಲು ಬಂದಿರಬಹುದು ಎನ್ನುತ್ತಿದ್ದಾರೆ.

ಆದಾಗ್ಯೂ ಇನ್ನು ಕೆಲವು ವಿಜ್ಜಾನಿಗಳು ಇದನ್ನು ಅಲ್ಲೆಗಳೆದಿದ್ದು ಇದು ಸ್ವಾಭಾವಿಕವಾಗಿಯೇ ಇರಬಹುದು ಆದರೆ ಇದರ ಬಗ್ಗೆ ನಿಖರವಾಗಿ ಹೇಳಲು ಇನ್ನು ಸಾಕಷ್ಟು ಅದರ ಬಗ್ಗೆ ದತ್ತಾಂಶಗಳನ್ನು ಸಂಗ್ರಹಿಸಬೇಕಾದ ಅಗತ್ಯವಿದೆ ಎಂದಿದ್ದಾರೆ.

ಒಟ್ಟಿನಲ್ಲಿ ಇದು ಮೇಲ್ಮೈ ನೋಟದಲ್ಲಿ ಧೂಮಕೇತು ಎಂದು ಕಂಡುಬಂದರೂ ನಿಖರವಾಗಿ ಇದು ಕಾಮೆಟ್ ಎಂದು ಹೇಳಲು ಸಾಧ್ಯವಾಗುತ್ತಿಲ್ಲ ಹಾಗೂ ನಿತ್ಯ ಇದರ ಬಗ್ಗೆ ಕುರಿತಾದ ಮಾಹಿತಿಗಳನ್ನು ಕಲೆಹಾಕುವಲ್ಲಿ ಜಗತ್ತಿನಾದ್ಯಂತ ಎಲ್ಲ ಖಗೋಳ ಶಾಸ್ತ್ರಜ್ಜರು ಹಾಗೂ ಟೆಲಿಸ್ಕೋಪ್ ಗಳು ಸದ್ಯ ಕಾರ್ಯನಿರತವಾಗಿವೆ.

ಭೂಮಿಗೆ ಇದು ಅಪಾಯಕಾರಿಯೇ?

ಸಾಮಾಜಿಕ ಮಾಧ್ಯಮಗಳಲ್ಲಿ ಈ ಬಗ್ಗೆ ಅಲ್ಲಲ್ಲಿ ವ್ಯಾಪಕವಾದ ಚರ್ಚೆಗಳು ನಡೆಯುತ್ತಿವೆ. ಇದೇನಾದರೂ ಭೂಮಿಗೆ ಅಪ್ಪಳಿಸಿದರೆ ಭೂಮಿಯ ಮೇಲಿರುವ ಎಲ್ಲ ಜೀವಿಗಳು ಕ್ಷಣಾರ್ಧದಲ್ಲಿ ನಿರ್ನಾಮ ಆಗುವುದಂತೂ ಖಂಡಿತ.

ಆದರೆ, ಭಯಪಡದಿರಿ, ಸದ್ಯದ ಲೆಕ್ಕಾಚಾರದಲ್ಲಿ ಅದು ಭೂಮಿಗೆ ಬಂದು ಅಪ್ಪಳಿಸುವ ಯಾವ ಸಾಧ್ಯತೆಯೂ ಇಲ್ಲ ಎನ್ನಲಾಗಿದೆ. ಅಲ್ಲದೆ ಇದು ನಮ್ಮ ಸೌರಮಂಡಲ ಪ್ರವೇಶಿಸಿರುವ ಮೂರನೇಯ ಅತಿಥಿಯಾಗಿದೆ. ಮುಂದಿನ ಕೆಲ ದಿನಗಳಲ್ಲಿ ಇದು ಭೂಮಿಯ ಹತ್ತಿರದಿಂದ ಹಾದು ಹೋಗುವ ಲೆಕ್ಕಾಚಾರವಿದ್ದು ಅದರ ಬಗ್ಗೆ ಇನ್ನಷ್ಟು ಮಾಹಿತಿ ಸಂಗ್ರಹಿಸಲು ವಿಜ್ಜಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.

3I ATLAS ಹೆಸರು ಬರಲು ಕಾರಣ

ಈ ಮೊದಲು ಮೊದಲ ಬಾರಿಗೆ Oumuamua ಎಂಬ ಒಬ್ಬ ಇಂಟರ್ಸ್ಟೆಲ್ಲಾರ್ ಅತಿಥಿ 2017 ರ ಅಕ್ಟೋಬರ್ ತಿಂಗಳಿನಲ್ಲಿ ಗೋಚರಿಸಿತ್ತು. ತದನಂತರ 2019 ರಲ್ಲಿ 2I Borisov ಎಂಬ ಇನ್ನೊಬ್ಬ ಅತಿಥಿ ಕಂಡಿತ್ತು. ಆದರೆ ಇವೆರಡು ಗಾತ್ರದಲ್ಲಿ ಚಿಕ್ಕದಾಗಿದ್ದವು.

ಆದರೆ ಜುಲೈ 1, 2025 ರಲ್ಲಿ ಕಂಡುಬಂದ ಈ 3I ATLAS ಗಾತ್ರದಲ್ಲಿ ಮುಂಚಿನ ಎರಡೂ ಅತಿಥಿಗಳಿಂದ ಸಾಕಷ್ಟು ದೊಡ್ಡದಾಗಿರುವುದು ಸಹ ವಿಜ್ಜಾನಿಗಳು ಅಚ್ಚರಿ ಪಡಲು ಮತ್ತೊಂದು ಕಾರಣವಾಗಿದೆ.

ಚಿಲಿ ದೇಶದಲ್ಲಿರುವ Astroid Terrestrial-impact Last Alert System (ATLAS) ಎಂಬ ಟೆಲಿಸ್ಕೋಪ್ ನಿಂದ ಇದನ್ನು ಮೊದಲ ಬಾರಿ ನೋಡಲಾಗಿರುವುದರಿಂದ ಇದಕ್ಕೆ ಅಟ್ಲಾಸ್ ಎಂದು ಹಾಗೂ ಇದು ಮೂರನೇಯ ಇಂಟರ್ಸ್ಟೆಲ್ಲಾರ್ ಆಬ್ಜೆಕ್ಟ್ ಆಗಿರುವುದರಿಂದ 3I ಎಂದು ಹೆಸರಿಸಿ ಒಟ್ಟಾರೆಯಾಗಿ ಇದನ್ನು 3I ATLAS ಎಂದು ಹೆಸರಿಸಲಾಗಿದೆ.