ನವರಾತ್ರಿ, ಹೆಸರೇ ಸೂಚಿಸುವಂತೆ ದೇವಿಗೆ ಮುಡಿಪಾದ ಒಂಭತ್ತು ರಾತ್ರಿಗಳ ಅವಧಿಗೆ ನಡೆಯುವ ಹಬ್ಬಗಳ ಪರ್ವ ಎಂದು ಹೇಳಬಹುದು. ಎಲ್ಲರೂ ಸಾಮಾನ್ಯವಾಗಿ ಈ ಅವಧಿಯಲ್ಲಿ ಮಾ ದುರ್ಗೆಯ ಒಂಭತ್ತು ಪ್ರತಿರೂಪಗಳನ್ನು ಒಂದೊಂದು ದಿನ ಒಂದೊಂದು ಅವತಾರದಲ್ಲಿ ಪೂಜಿಸುತ್ತಾರೆ.
ಈ ಸಂದರ್ಭದಲ್ಲಿ ದೇವಿಯ ದೇಗುಲಗಳು ಪೂರ್ಣ ಒಂಭತ್ತು ದಿನಗಳ ಕಾಲ ತಮ್ಮಲ್ಲಿ ಪ್ರತಿಷ್ಠಾಪಿಸಲ್ಪಟ್ಟಿರುವ ದೇವಿಗೆ ನಾನಾ ಅಲಂಕಾರಗಳನ್ನು ಮಾಡಿ ಮಹಾಮಂಗಳಾರತಿ ನೆರವೇರಿಸಿ ಮಹಾಪ್ರಸಾದ ನೀಡುವುದು ಒಂದು ಸಂಪ್ರದಾಯವಾಗಿದೆ.
ಅಂದರೆ, ಸಾಮಾನ್ಯವಾಗಿ ನಾವೆಲ್ಲರೂ ನವರಾತ್ರಿ ಎಂದಾಗ ನವದುರ್ಗೆಯರ ರಾತ್ರಿಗಳು ಎಂದು ಪರಿಗಣಿಸಿ ಆ ದೇವಿಯನ್ನು ಪೂಜಿಸುತ್ತೇವೆ, ಭಜಿಸುತ್ತೇವೆ ಹಾಗೂ ಕೊಂಡಾಡುತ್ತೇವೆ. ಇರಲಿ, ಅದು ಸಹ ಸರಿಯಾಗಿಯೇ ಇದೆ. ಆದರೆ ಅದನ್ನು ಮೀರಿ ಶಾಸ್ತ್ರೀಯವಾಗಿ ಹೇಳಬೇಕೆಂದರೆ ನವರಾತ್ರಿಗಳು ಒಂಭತ್ತು ನಿರ್ದಿಷ್ಟ ಶಕ್ತಿಗಳಿಗೆ ಸಮರ್ಪಿತವಾದ ರಾತ್ರಿಗಳಾಗಿವೆ.
ಗಣೇಶ ಚತುರ್ಥಿಯಂದು ನಾವು ಗಣೇಶನನ್ನು ಪೂಜಿಸಿದರೆ, ಕೃಷ್ಣಾಷ್ಟಮಿಯಂದು ಕೃಷ್ಣನನ್ನು ಹಾಗೂ ರಾಮನವಮಿಯಂದು ಶ್ರೀರಾಮನನ್ನು ಪೂಜಿಸುತ್ತೇವೆ. ಅದರಂತೆ ನವರಾತ್ರಿಯಂದು ದುರ್ಗಾ ದೇವಿಯನ್ನು ಪೂಜಿಸುತ್ತೇವೆ ಸಾಮಾನ್ಯವಾಗಿ. ಆದರೆ, ಅಸಲಿಗೆ ನವರಾತ್ರಿ ಸಂದರ್ಭದಲ್ಲಿ ಪ್ರಧಾನವಾಗಿ ಪೂಜಿಸಬೇಕಾಗಿರುವುದು ನವ ಬಗೆಯ ಶ್ರೀ ಚಕ್ರಗಳನ್ನ.
ಹಾಗಾದರೆ, ಆ ಚಕ್ರಗಳು ಯಾವುವು, ದುರ್ಗೆಯ ಒಂಭತ್ತು ರೂಪಗಳನ್ನ ನಾವು ಈ ಸಂದರ್ಭದಲ್ಲಿ ಪೂಜಿಸುವುದಾದರೂ ಏಕೆ ಎಂಬ ಪ್ರಶ್ನೆಗಳು ಮೂಡುವುದು ಸಹಜ. ಅದಕ್ಕೊಂದಿಷ್ಟು ಹಿನ್ನೆಲೆಯನ್ನ ಅಥವಾ ಆ ಬಗ್ಗೆ ಸ್ವಲ್ಪ ಜ್ಜಾನವನ್ನು ಪಡೆಯುವುದು ಇಲ್ಲಿ ಅನಿವಾರ್ಯವಾಗುತ್ತದೆ.
ದುರ್ಗೆ ಎಂದರೇನು ಮೊದಲು
ಈಗ ಕಲ್ಪಿಸಿಕೊಳ್ಳಿ ದುರ್ಯೋಧನನ ಹೆಸರನ್ನೊಮ್ಮೆ. ಅವನಿಗೆ ದುರ್ಯೋಧನ ಎಂಬ ಹೆಸರು ಏಕೆ ಬಂತು ಅಂತ ಕೇಳಿದರೆ ಹಲವರು ದುರಾಚಾರ ಹಾಗೂ ಯೋಧನಾಗಿದ್ದರಿಂದ ದುರ್ಯೋಧನ ಎಂಬ ಹೆಸರು ಎಂದು ತಲೆ ಯೋಚಿಸಿ ಹೇಳಬಹುದೇನೋ…ಆದರೆ ಯಾವ ತಾಯಿ-ತಂದೆಯರಾಗಲಿ ತಮ್ಮ ಮಗನಿಗೆ ಹೀಗೆ ಹೆಸರು ನೀಡಬಲ್ಲರು?
ಇಲ್ಲಿ ಅರ್ಥೈಸಿಕೊಳ್ಳ ವಿಷಯವೇನೆಂದರೆ ದುರ್ ಎಂದರೆ ದುರ್ಗವಾದದ್ದು, ಅಡೆ-ತಡೆಗಳಿಂದ ಕೂಡಿರುವಂಥದ್ದು….ಅಂದರೆ ಆ ಯೋಧನ ಬಳಿ ನೀವು ಸರಳವಾಗಿ ಹೋಗಲಾರಿರಿ, ಸಿಕ್ಕಾಪಟ್ಟೆ ಕಷ್ಟ ಪಡಬೇಕು…ಅವನ ಬಳಿ ಸಾಗುವ ಪಥ ಬಲು ದುರ್ಗಮವಾಗಿದೆ ಎಂಬುದು ಇದರ ಅರ್ಥ. ಅಂದರೆ ದುರ್ಯೋಧನನ್ನು ಹಾಗೆ ಸಮೀಪಿಸುವುದು ಸರಳವಲ್ಲ ಎಂಬುದನ್ನು ದುರ್ಯೋಧನ ಪದ ಅರ್ಥ ನೀಡುತ್ತದೆ.
ಇದನ್ನೇ ದುರ್ಗೆಗೂ ಅನ್ವಯಿಸಬೇಕಾಗಿದೆ ಇಲ್ಲ. ಅಂದರೆ ಅವಳನ್ನು ಒಲಿಸಿಕೊಳ್ಳುವುದು ಸರಳವಲ್ಲ. ಅದಕ್ಕಾಗಿ ತಪಸ್ಸು ಮಾಡಬೇಕು, ಕಷ್ಟ ಪಡಬೇಕು, ಉಪಾಸನೆ ಮಾಡಬೇಕು, ಎಲ್ಲಕ್ಕಿಂತ ಮುಖ್ಯವಾಗಿ ನೀವು ಇದಕ್ಕಾಗಿ ಶ್ರದ್ಧೆ ಭಕ್ತಿಗಳಿಂದ ನಿಮ್ಮನ್ನು ನೀವು ಸಮರ್ಪಿಸಿಕೊಳ್ಳಬೇಕು.
ಹಾಗಾದಾಗ ಮಾತ್ರ ನೀವು ಆ ಮಾತೆ ದುರ್ಗೆಯ ಕೃಪಾಕಟಾಕ್ಷಕ್ಕೆ ಪಾತ್ರರಾಗುತ್ತೀರಿ ಎಂದರ್ಥ. ಏಕೆಂದರೆ ಆ ದುರ್ಗೆಯು ಸಹ ತಾನು ದುರ್ಗೆಯಾಗಲು ಬಲು ದುರ್ಗಮದ ಹಾದಿಯನ್ನು ಸಾಗಿ ಸಾಧಿಸಿದ್ದಾಳೆ, ಹಾಗಾಗಿ ಅವಳು ನಮಗೆ ಸುಗಮವಾಗಿ ಒಳಿಯುವುದಿಲ್ಲ ಎಂಬುದನ್ನು ಇಲ್ಲಿ ತಿಳಿಯಬೇಕಾಗುತ್ತದೆ.
ಇನ್ನು, ಶಂಕರ ಭಗವತ್ಪಾದರು (ಆದಿ ಶಂಕರಾಚಾರ್ಯರು) ನಿರಾಕಾರ ತತ್ವಕ್ಕೆ ಪ್ರಾಧನ್ಯತೆ ನೀಡಿದ್ದರು. ಯಂತ್ರ ಅಥವಾ ಚಕ್ರ ಎಂಬುದು ನಿರಾಕಾರವಾಗಿದ್ದು(ಶರೀರ ರೂಪದ್ದಲ್ಲ) ತೇಜೋಮಯವಾದ, ಮಂತ್ರಶಕ್ತಿಯಿಂದ ಕೂಡಿದ ಬೀಜಾಕ್ಷರಗಳನ್ನು ಹೊಂದಿದ್ದು ಇದು ಅದ್ವೈತ ತತ್ವದೊಂದಿಗೆ ಸಾಮರಸ್ಯ ಸಾಧಿಸುತ್ತದೆ.
ಹಾಗಾಗಿ ಇದನ್ನು ಅಧ್ಯಯನ ಮಾಡಿದ ಶಂಕರರು ಶಾಕ್ತೇಯ ಪಂಥಕ್ಕೆ ಅನುಸಾರವಾದ ದುರ್ಗಾಸಪ್ತಶತಿಯೊಂದಿಗೆ ಇದನ್ನು ಸಂಯೋಜಿಸಿದರು. ಆ ಪ್ರಕಾರವಾಗಿ ನವದುರ್ಗೆಯರು ನವಶಕ್ತಿ ಯಂತ್ರಗಳ ಸ್ವರೂಪವಾಗಿಯೂ, ಸಾಂಕೇತಿಕವಾಗಿ ಅದಕ್ಕನುಸಾರವಾದ ನಿರ್ದಿಷ್ಟ ದುರ್ಗೆಯರ ರೂಪದಲ್ಲಿ ನವರಾತ್ರಿಯನ್ನು ಮಾಡಬೇಕು.
ಇದನ್ನೆ ನವಾವರಣ ಪೂಜೆ, ನವಾಕ್ಷರಿ ಪೂಜೆ ಎಂತಲೂ ಕರೆದು ನವರಾತ್ರಿ ಮಾಡಲಾಗುತ್ತದೆ ಹಾಗೂ ಇದು ರಾತ್ರಿಯ ಕಲ್ಪವಾದ್ದರಿಂದ ರಾತ್ರಿಯಲ್ಲಿಯೇ ಇದನ್ನು ಮಾಡಲಾಗುತ್ತದೆ. ನವ ಚಕ್ರಗಳ ಶಕ್ತಿಯನ್ನು ಪೂಜಿಸುವುದೆ ಈ ನವರಾತ್ರಿಗಳಲ್ಲಿ ಎನ್ನಬಹುದು.
ಆ ನವಶಕ್ತಿಚಕ್ರ ಯಂತ್ರಗಳು ಈ ಕೆಳಗಿನಂತಿವೆ
ಬಿಂದು
ತ್ರಿಕೋಣ
ವಸುಕೋಣ
ದಶಾರ
ಯುಗ್ಮ
ಮನ್ವಸ್ತ್ರ
ನಾಗದಳ
ಶೋಢಷವತ್ರಯುಕ್ತ
ವೃತ್ತತ್ರಯಂಚ
ನವರಾತ್ರಿ ಎಂಬುದು ಮುಖ್ಯವಾಗಿ ಒಂಭತ್ತು ಶಕ್ತಿ ಚಕ್ರ ಯಂತ್ರಗಳ ಪೂಜೆಯನ್ನು ಒಳಗೊಂಡಿದ್ದು ಆಯಾ ಶಕ್ತಿಗನುಗುಣವಾಗಿ ಆಯಾ ದಿನಗಳಲ್ಲಿ ದುರ್ಗೆಯನ್ನು ಆರಾಧಿಸಲಾಗುತ್ತದೆ. ಅಂದರೆ ನವರಾತ್ರಿಯನ್ನು ಜನಮಾನಸ ವಲಯದಲ್ಲಿ ಸರಳೀಕರಿಸಿ ಹೇಳುವುದಾದರೆ ಈ ರಾತ್ರಿಗಳು ಪ್ರಧಾನವಾಗಿ ಪಾರ್ವತಿ/ದುರ್ಗೆಯ ಮೇಲೆ ಕೇಂದ್ರೀಕರಿಸಲ್ಪಟ್ಟಿವೆ.
ನೀವು ಈ ಸಂದರ್ಭದಲ್ಲಿ ಒಂಭತ್ತು ದಿನಗಳ ಕಾಲ ಆ ದುರ್ಗೆಯ ಅರ್ಚನೆ ಮಾಡಿದಾಗ ನೀವು ಸಂಕಲ್ಪಿಸಿದ ಎಲ್ಲ ಕಾರ್ಯಗಳು ಆಗುತ್ತವೆ ಎಂಬ ನಂಬಿಕೆಯಿದೆ. ಆದರೆ ನೆನಪಿಡಿ, ಇಲ್ಲಿ ನವರಾತ್ರಿಗಳನ್ನು ಆಕಾರ ರೂಪದಲ್ಲಿರುವ ನವದುರ್ಗೆಯರ ಪೂಜೆ ಮಾಡುವುದನ್ನು ಒಳಗೊಂಡಿದ್ದರೂ ಮೂಲದಲ್ಲಿ ಅಥವಾ ವಾಸ್ತವದಲ್ಲಿ ನವ ಶಕ್ತಿ ಚಕ್ರಗಳಿಗೆ ಮಾಡಬೇಕಾಗಿರುವ ಪೂಜೆಯಾಗಿದೆ.
ಇನ್ನು ಇಲ್ಲಿ ಒಂಭತ್ತೆ ಏಕೆ ಎಂಬ ಪ್ರಶ್ನೆ ಮೂಡಬಹುದು. ಸಂಖ್ಯಾಶಾಸ್ತ್ರದಲ್ಲಿ ಅತಿ ಗರಿಷ್ಠವಾದ ಸಂಖ್ಯೆ ಒಂಭತ್ತು ಆಗಿದೆ, ಅಲ್ಲದೆ ಈ ಸಂಖ್ಯೆ ಹಲವು ವಿಶೇಷತೆಗಳನ್ನೂ ಸಹ ಹೊಂದಿದೆ.
ಇನ್ನೊಂದು ಸ್ವಾರಸ್ಯಕರ ವಿಷಯವೆಂದರೆ ನವದುರ್ಗೆಯರ ನವ ರೂಪಗಳನ್ನು ನಾವು ನಮ್ಮ ಜೀವನದ ಪ್ರಾರಂಭದಿಂದ ಅಂತ್ಯದವರೆಗೂ ಹೇಗೆಲ್ಲ ಸಾಗುತ್ತದೆ ಎಂಬುದನ್ನು ತಿಳಿಯುವುದಕ್ಕೂ ಅನ್ವಯಿಸಿಕೊಳ್ಳಬಹುದು.
ಆ ಪ್ರಕಾರ ನೋಡುವುದಾದರೆ ಒಂಭತ್ತು ದುರ್ಗೆಯರು ಪ್ರತಿಯೊಬ್ಬರ ಜೀವನದ ಒಂಭತ್ತು ಪ್ರಮುಖ ಘಟ್ಟಗಳನ್ನು ಹೇಗೆಲ್ಲ ಪ್ರತಿನಿಧಿಸುತ್ತಾಳೆ ಎಂದು ತಿಳಿಯಿರಿ. ಇದು ಶಾಸ್ತ್ರೀಯವಾಗಿ ಎಲ್ಲಿಯೂ ಹೇಳಿಲ್ಲವಾದರೂ ಇದನ್ನು ನಮ್ಮ ಅಂತರ್ಮನವನ್ನು ಬಿಚ್ಚಿ ಸಕಾರಾತ್ಮಕ ರೂಪದಲ್ಲಿ ಅನಂತ ಚೈತನ್ಯದಿಂದ ಜೀವನಕ್ಕೆ ಅಳವಡಿಸಿಕೊಂಡಾಗ ನವರಾತ್ರಿಯ ಸಾರ್ಥಕ ಮನೋಭಾವವನ್ನು ನಾವೆಲ್ಲರೂ ಪಡೆಯಬಹುದು. ಬನ್ನಿ, ಈ ಬಗ್ಗೆ ಇಲ್ಲೀಗ ಚರ್ಚಿಸೋಣ.
ಮೊದಲ ಶಕ್ತಿ : ಶೈಲ ಪುತ್ರಿ – ಸೃಷ್ಟಿ
ಹೆಸರೇ ಸೂಚಿಸುವಂತೆ ಗಿರಿಗಳ/ಪರ್ವತಗಳ ರಾಜನಾದ ಹಿಮವಂತನ ಪುತ್ರಿಯೇ ಶೈಲಪುತ್ರಿಯಾಗಿದ್ದು ಈ ದೇವಿಯ ಸ್ವರೂಪವು ನಮ್ಮ ಜೀವನದ ಬಾಲಾವಸ್ಥೆಯನ್ನು ರೂಪಿಸುತ್ತದೆ. ಇದು ಬಾಲ್ಯದಲ್ಲಿ ವ್ಯಕ್ತಿಯೊಬ್ಬನ ಮುಗ್ಧತೆ, ಪ್ರಾಮಾಣಿಕತೆ ಹಾಗೂ ನಿಶ್ಕಲ್ಮಷ ಮನಸ್ಥಿತಿಯನ್ನು ಸೂಚಿಸುತ್ತದೆ. ಅಂದರೆ ಮೊದಲ ದಿನದಿಂದ ನಾವು ಬಲು ಭಕ್ತಿ, ಶೃದ್ಧೆಯಿಂದ, ಮುಗ್ಧತೆಯಿಂದ ಸಮರ್ಪಿತ ಮನೋಭಾವದಿಂದ ನಮ್ಮ ಆಚರಣೆಯನ್ನು ಪ್ರಾರಂಭಿಸಬೇಕು ಎಂಬುದನ್ನು ಇದು ಸೂಚಿಸುತ್ತದೆ.
ಆದರೆ ಅಸಲಿನಲ್ಲಿ ನಾವು ಮೊದಲನೆಯ ದಿನದಂದು ಬಿಂದು ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಎರಡನೇ ಶಕ್ತಿ : ಬ್ರಹ್ಮಚಾರಿಣಿ – ಗ್ರಹಿಕೆ
ನಾವು ಹುಟ್ಟಿ ಇಂತಿಷ್ಟು ವಯಸ್ಸು ಅಂತ ಆದ ಮೇಲೆ ಮೊದಲಿಗೆ ಬದುಕಿನಲ್ಲಿ ಪ್ರಾರಂಭವಾಗುವುದೇ ಶಿಕ್ಷಣ ಗ್ರಹಣ ಮಾಡುವ ಪರ್ವ. ಅಂದರೆ ನಾವು ಕಲಿಜೆಯನ್ನು ಪ್ರಾರಂಭಿಸಿ ನಮ್ಮ ಸುತ್ತಮುತ್ತಲಿನ ವಿವಿಧ ಆಯಾಮಗಳನ್ನು ಗ್ರಹಿಸಲು ಪ್ರಾರಂಭಿಸುತ್ತೇವೆ. ಸಾಮಾನ್ಯವಾಗಿ ವ್ಯಕ್ತಿಯೊಬ್ಬ ತಾನು ಗ್ರಹಸ್ಥ ಜೀವನಕ್ಕೆ ಕಾಲಿಡುವ ಮುಂಚೆ ಬ್ರಹ್ಮಚರ್ಯದಲ್ಲಿದ್ದು ತನ್ನ ಶಿಕ್ಷಣವನ್ನು ಪೂರ್ಣಗೊಳಿಸುತ್ತಾನೆ. ಅದರಂತೆ ಬ್ರಹ್ಮಚಾರಿಣಿಯ ಉಪಸನೆಯು ನಾವು ನಮ್ಮಲ್ಲಿರುವ ಗ್ರಹಿಸುವ ಶಕ್ತಿಯನ್ನು ಉತ್ತೇಜಿಸುವ ಗುರಿ ಹೊಂದಿದೆ ಎನ್ನಬಹುದು.
ಹೂವು ಮತ್ತು ಘಟವನ್ನು ತನ್ನ ಕೈಗಳಲ್ಲಿ ಹಿಡಿದಿರುವ ಈ ದೇವಿಯು ಜ್ಜಾನವನ್ನು ಹೆಚ್ಚಿಸಿಕೊಳ್ಳುವ, ಸಂಗ್ರಹಿಸಿಕೊಳ್ಳುವ ಪ್ರತೀಕದಂತಿದ್ದು ಇದು ನಮ್ಮ ಜೀವನದಲ್ಲಿ ನಾವು ಮುಂದಿನ ಘಟಕ್ಕೆ ಸಿದ್ಧವಾಗಲು ಬೇಕಾಗಿರುವ ಅಗತ್ಯವಾದ ಜ್ಜಾನವನ್ನು ಸಂಪಾದಿಸಿಕೊಳ್ಳಬೇಕೆಂಬುದನ್ನು ಸೂಚಿಸುತ್ತದೆ.
ಆದರೆ ಅಸಲಿನಲ್ಲಿ ನಾವು ಎರಡನೆಯ ದಿನದಂದು ತ್ರಿಕೋಣ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಮೂರನೆಯ ಶಕ್ತಿ : ಚಂದ್ರಘಂಟಾ – ಯೋಧನಾಗಿ ಸಜ್ಜಾಗುವುದು
ನಮ್ಮ ಶಿಕ್ಷಣವನ್ನೆಲ್ಲ ಮುಗಿಸಿದ ತರುವಾಯ ಜಗತ್ತಿನಲ್ಲಿ ನಮ್ಮದೆ ಆದ ಅಸ್ತಿತ್ವವನ್ನು ರೂಪಿಸಿಕೊಳ್ಳಲು ನಾವು ಸ್ಪರ್ಧಾತ್ಮಕತೆ ಎಂಬ ಯುದ್ಧದಲ್ಲಿ ಹೋರಾಡಬೇಕಾಗುತ್ತದೆ. ಅದಕ್ಕಾಗಿ ನಮ್ಮ ಬಳಿ ಎಲ್ಲ ರೀತಿಯ ಕಲೆ, ಕೌಶಲ್ಯ, ಶಿಕ್ಷಣ, ಬುದ್ಧಿವಂತಿಕೆಯ ಜ್ಞಾನಗಳಿರಬೇಕು ಹಾಗೂ ಅವುಗಳನ್ನು ಬಳಸುತ್ತ ನಾವು ಒಬ್ಬ ಯೋಧನಂತೆ ಹೋರಾಡಲು ಸಜ್ಜಾಗಬೇಕು.
ಇದನ್ನೇ ಸಾಂಕೇತಿಕವಾಗಿ ದೇವಿಯ ಚಂದ್ರಘಂಟಾ ಸ್ವರೂಪವು ನಮಗೆ ತಿಳಿಸುತ್ತದೆ. ಅವಳ ಕೈಗಳಲ್ಲಿರುವ ಹಲವು ಅಸ್ತ್ರಗಳು ನಾವು ಕರಗತ ಮಾಡಿಕೊಳ್ಳಬೇಕಾದ ಹಲವು ಜ್ಞಾನ, ಕೌಶಲ್ಯಗಳ ಪ್ರತೀಕವಾಗಿವೆ. ಅವಳ ಹಣೆಯಲ್ಲಿರುವ ನೇತ್ರವು ನಮ್ಮ ಜ್ಞಾನೇಂದ್ರಿಯವನ್ನು ಸಂಕೇತಿಸುತ್ತದೆ ಎನ್ನಬಹುದು.
ಆದರೆ ಅಸಲಿನಲ್ಲಿ ನಾವು ಮೂರನೆಯ ದಿನದಂದು ವಸುಕೋಣ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ನಾಲ್ಕನೆಯ ಶಕ್ತಿ : ಕುಶ್ಮಾಂಡಾ – ಜಗತ್ ಜನನಿ
ಇದು ಮುಖ್ಯವಾಗಿ ಸ್ತ್ರೀಯೊಬಳು ಮತ್ತೊಂದು ಜೀವನವನ್ನು ಭುವಿಗೆ ಕರೆದುತರುವುದರ ಪ್ರತೀಕವೆಂದು ಭಾವಿಸಬಹುದು. ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಮಹಿಳೆ ತಾಯಿಯಾಗುವ ಮೂಲಕ ಆ ಪವಿತ್ರ ಭಾವನೆಯನ್ನು ಅನುಭವಿಸುತ್ತಾಳೆ. ಅದರಂತೆ ಕುಶ್ಮಾಂಡಾ ದೇವಿಯು ಜಗತ್ ಜನನಿಯಾಗಿ ಭಕ್ತರನ್ನು ಪೊರೆಯುತ್ತಾಳೆ, ಮತ್ತೊಂದು ಜೀವನದ ಹುಟ್ಟಿಗೆ ಮುನ್ನುಡಿ ಬರೆಯುತ್ತಾಳೆ ಎಂದು ನಾವಿಲ್ಲಿ ಅರ್ಥೈಸಿಕೊಳ್ಳಬಹುದು.
ಆದರೆ ಅಸಲಿನಲ್ಲಿ ನಾವು ನಾಲ್ಕನೆಯ ದಿನದಂದು ದಶಾರ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಐದನೆಯ ಶಕ್ತಿ : ಸ್ಕಂದಮಾತಾ – ರಕ್ಷಣಾತ್ಮಕ ತಾಯಿ
ಸ್ತ್ರೀಯೊಬ್ಬಳು ತಾಯಿಯಾದ ಮೇಲೆ ಮೊದಲು ಅವಳು ಎಲ್ಲಕ್ಕಿಂತ ಮಿಗಿಲಾಗಿ ತನ್ನ ಸಂತಾನದ ರಕ್ಷಣೆಗೆ ಕಟಿ ಬದ್ಧಳಾಗಿರುತ್ತಾಳೆ. ತನ್ನ ಮಗುವನ್ನು ಯಾವುದೇ ರೀತಿಯ ಅಪಾಯ ಏನೂ ಮಾಡದಂತೆ ತೀವ್ರವಾಗಿ ರಕ್ಷಣಾತ್ಮಕಳಾಗಿರುತ್ತಾಳೆ. ಮಗುವಿನ ಲಾಲನೆ-ಪೋಷಣೆ ಅವಳಿಗೆ ಪ್ರಾಧಾನ್ಯವಾಗಿರುತ್ತದೆ. ದೇವಿಯ ಈ ರೂಪವನ್ನು ಐದನೇಯ ದಿನದಂದು ಸ್ಕಂದಮಾತಾ ರೂಪದಲ್ಲಿ ಆರಾಧಿಸಲಾಗುತ್ತದೆ.
ಆದರೆ ಅಸಲಿನಲ್ಲಿ ನಾವು ಐದನೆಯ ದಿನದಂದು ಯುಗ್ಮ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಆರನೆಯ ದಿನ : ಕಾತ್ಯಾಯಿನಿ – ಗಟ್ಟಿ ಮತ್ತು ಅಭೇದ್ಯದ ಭದ್ರತೆಐಪಿಎಲ್
ಇದು ಸಹ ರಕ್ಷಣಾತ್ಮಕತೆಯನ್ನೆ ಬಿಂಬಿಸುತ್ತದೆಯಾದರೂ ಮಕ್ಕಳು ಬೆಳೆದಂತೆ ಅವರಿಗೆ ಎದುರಾಗುವ ಅಪಾಯಗಳು ಹಾಗೂ ಅಡೆ-ತಡೆಗಳನ್ನು ನಾಶಪಡಿಸಿ ಮುಂದೆ ಕರೆದೊಯ್ಯುವ ತಯಿಯ ಗಟ್ಟಿ ಮತ್ತು ಸದೃಢವಾದ ಮನಸ್ಥಿತಿಯನ್ನು ಪ್ರತಿನಿಧಿಸುತ್ತದೆ. ಮಕ್ಕಳು ಬಾಲ್ಯಾವಸ್ಥೆ ದಾಟಿ ಯವ್ವನದ ಹೊಸ್ತಿಲಿಗೆ ಬರುತ್ತಿದ್ದ ಹಾಗೆ ತಾಯಿಯಾದವಳು ಹಿಂದೆಂದಿಗಿಂತಲೂ ಬಲಶಾಲಿಯಾಗುತ್ತಾಳೆ. ಇದನ್ನೆ ಕಾತ್ಯಾಯಿನಿ ಸ್ವರೂಪವು ಬಹಿರಂಗಪಡಿಸುತ್ತದೆ.
ಇನ್ನೊಂದೆಡೆ ಈ ಸ್ವರೂಪವು ಸಾಮಾನ್ಯವಾಗಿ ನಾವು ಜೀವನದ ಈ ಘಟ್ಟದಲ್ಲಿ ಮಾನಸಿಕವಾಗಿ ಬಲು ಸದೃಢವನ್ನಾಗಿಸಿಕೊಳ್ಳಬೇಕೆಂಬುದನ್ನು ಸೂಚಿಸುತ್ತದೆ. ಈ ಸಂದರ್ಭದಲ್ಲಿ ಆಕಸ್ಮಿಕವಾಗಿ ಹಲವು ತೊಂದರೆಗಳು ಜೀವನದಲ್ಲಿ ಎದುರಾಗಬಹುದು. ನಾವು ನಮ್ಮ ಮನಸ್ಥಿತಿಯನ್ನು ಬಲಪಡಿಸಿಕೊಂಡಾಗ ಮಾತ್ರವೇ ಅವುಗಳನ್ನು ಎದುರಿಸಲು ಸಶಕ್ತರಾಗುತ್ತೇವೆ ಎಂಬುದನ್ನೂ ಇದು ಸೂಚಿಸುತ್ತದೆ.
ಆದರೆ ಅಸಲಿನಲ್ಲಿ ನಾವು ಆರನೆಯ ದಿನದಂದು ಮನ್ವಸ್ತ್ರ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಏಳನೆಯ ದಿನ : ಕಾಳರಾತ್ರಿ – ಅದ್ವಿತೀಯ ಶಕ್ತಿ
ಮಧ್ಯ ವಯಸ್ಕರಾದಾಗ ಜೀವನದಲ್ಲಿ ಹಲವು ತಿರುವುಗಳನ್ನು ಕಾಣಬಹುದು. ಅನಿರೀಕ್ಷಿತ ಘಟನೆಗಳು ಉಂಟಾಗಬಹುದು, ಅನಾರೋಗ್ಯದ ಸಮಸ್ಯೆಗಳು ಬರಬಹುದು, ಅಪ್ರಿಯಕರ ಘಟನೆಗಳು ಉಂಟಾಗಬಹುದು, ಏನೋ ಒಂದು ರೀತಿಯ ಚಡಪಡಿಕೆಯ ಮನಸ್ಥಿತಿ ಹಲವರಲ್ಲಿ ಉಂಟಾಗಬಹುದು.
ಒಂದೊಮ್ಮೆ ರಾತ್ರಿಯ ಪರಿಕಲ್ಪನೆಯನ್ನ ಊಹಿಸಿಕೊಳ್ಳಿ. ನಾವು ಎಷ್ಟೇ ಧೈರ್ಯವಂತರಿದ್ದರೂ ರಾತ್ರಿಯ ಸಮಯ ಎಂಬುದು ನಮ್ಮನ್ನು ತನ್ನ ತೆಕ್ಕೆಗೆ ಹಾಕಿಕೊಳ್ಳುವುದು ಬಲು ಸಹಜ. ಒಬ್ಬರೆ ಇರುವಾಗ ರಾತ್ರಿಯ ಸಮಯ ಒಂದು ರೀತಿಯ ಭಯ ಉಂಟಾಗುವಂತೆ ಮಾಡುವುದು ಸಹಜ. ಆದರೆ ಭಯವನ್ನು ನಿವಾರಿಸಿಕೊಳ್ಳುವುದೆ ಇದಕ್ಕಿರುವ ಉಪಾಯ.
ಇದನ್ನೇ ಕಾಳೆರಾತ್ರಿಯ ಸ್ವರೂಪದ ದೇವಿಯನ್ನು ಉಪಾಸನೆ ಮಾಡಿದಾಗ ನಮಗೆ ದೊರಕುವ ಫಲ. ಮಧ್ಯ ಜೀವನದಲ್ಲೂ ಸಹ ಎದುರಾಗುವ ಸಮಸ್ಯೆಗಳನ್ನು ನಿರ್ವಹಿಸಲು ಈ ದೇವಿಯ ಕೃಪೆ ನಮ್ಮ ಮೇಲಿರಬೇಕು. ಅದಕ್ಕಾಗಿಯೇ ಅತ್ಯಂತ ಭಯಂಕರ ರೂಪದಲ್ಲಿರುವ ಈ ದೇವಿಯನ್ನು ಏಳನೆಯ ದಿನ ಆರಾಧಿಸಲಾಗುತ್ತದೆ.
ಮಧ್ಯ ರಾತ್ರಿಯ ಹಾಗೂ ಮಧ್ಯ ಜೀವನದ ಆ ಎಲ್ಲ ಆತಂಕ ಭಯಗಳನ್ನು ನಿರ್ವಹಿಸುವ ಅಪ್ರತಿಮ ಶಕ್ತಿ ಈ ದೇವಿಗಿದೆ. ಅವಳನ್ನು ಪೂಜಿಸುವ ಮೂಲಕ ನಾವೂ ಈ ಶಕ್ತಿಯನ್ನು ಪಡೆಯಬೇಕು ಎಂಬುದು ಇದರ ತಾತ್ಪರ್ಯ ಎನ್ನಬಹುದೇನೋ.
ಆದರೆ ಅಸಲಿನಲ್ಲಿ ನಾವು ಏಳನೆಯ ದಿನದಂದು ನಾಗದಳ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಎಂಟನೆಯ ಶಕ್ತಿ : ಮಹಾಗೌರಿ – ಶಾಂತ ಹಾಗೂ ಗಾಂಭೀರ್ಯಕ್ಕಿಂತ
ನಮ್ಮ ಜೀವನ ಮುಪ್ಪನ್ನು ಸಮೀಪಿಸುವ ಸಮಯಕ್ಕೆ ಬಂದಾಗ ಜೀವನ ಪ್ರಯಾಣದ ಬಹುತೇಕ ಪ್ರಮುಖ ಘಟ್ಟಗಳನ್ನು ನಾವು ದಾಟಿ ಅದರಿಂದ ಬಂದ ಅನುಭವಗಳಿಂದ ಶ್ರೀಮಂತರಾಗಿರುತ್ತೇವೆ. ಹೀಗೆ ನಮ್ಮಲ್ಲಿ ಕ್ರೋಢೀಕೃತಗೊಂಡ ಅನುಭವದ ಬುದ್ಧಿವಂತಿಕೆ ನಮ್ಮನ್ನು ಪ್ರಶಾಂತ ಹಾಗೂ ಅಷ್ಟೇ ಗಾಂಭೀರ್ಯದಿಂದಿರುವಂತೆ ಪ್ರೇರೇಪ್ಸಿತ್ತದೆ.
ಮಹಾಗೌರಿಯ ಈ ಅವತಾರವೇ ನಮ್ಮ ಜೀವನದ ಈ ಘಟ್ಟವನ್ನು ಪ್ರತಿಬಿಂಬಿಸುತ್ತದೆ ಎನ್ನಬಹುದು. ಹೇಗೆ ಗೌರಿ ಶಾಂತಚಿತ್ತಳಾಗಿ ವೈಭವದಿಂದ ಮೆರಗುತ್ತಿರುವಂತೆ ಇರುವಳೋ ಅದೇ ರೀತಿ ನಮ್ಮ ಜೀವನವನ್ನು ಒಂದು ಹಂತಕ್ಕೆ ಕರೆತಂದು ನಮ್ಮಲ್ಲೂ ಶಾಂತ ಮನಸ್ಥಿತಿಯನ್ನು ರೂಪಿಸಿಕೊಳ್ಳಬೇಕೆಂಬುದನ್ನು ಇದು ಸೂಚಿಸುತ್ತದೆ.
ಆದರೆ ಅಸಲಿನಲ್ಲಿ ನಾವು ಎಂಟನೆಯ ದಿನದಂದು ಶೋಢಷವತ್ರಯುಕ್ತ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಒಂಭತ್ತನೆಯ ಶಕ್ತಿ : ಸಿದ್ಧಿದಾತ್ರಿ – ಬುದ್ಧಿವಂತಿಕೆ ಮತ್ತು ಕರುಣಾಮಯಿಗಳನ್ನಾಗಿ
ಇನ್ನು ಜೀವನದ ಸಂಧ್ಯಾಕಾಲವು ಅತ್ಯಂತ ಮಹತ್ವಪೂರ್ಣ ಹಾಗೂ ಜ್ಞಾನ ಮತ್ತು ಬುದ್ಧಿವಂತಿಕೆಯ ಶ್ರೀಮಂತಿಕೆಯಿಂದ ಕಂಗೊಳಿಸುತ್ತಿರುತ್ತದೆ. ಜೀವನಾದ್ಯಂತ ನಾವು ನಡೆದುಕೊಂಡಂತಹ ಬಗೆ, ನಾವು ಮಾಡಿದ ಕರ್ಮಗಳು, ಆಚಾರ -ವಿಚಾರಗಳಿಂದ ನಮ್ಮಲ್ಲೊಂದು ಸಿದ್ಧಿ ಲಭಿಸಿರುತ್ತದೆ, ಅದೇ ಜ್ಞಾನ ಹಾಗೂ ಕರುಣೆಯ ವ್ಯಕ್ತ ರೂಪ.
ಇದು ಇನ್ನು ಭೂಮಿಯ ಮೇಲಿನ ಶರೀರದ ಋಣವನ್ನು ತೀರಿಸುವ ಹಾಗೂ ಆ ಪರಮಾತ್ಮನ ಸಾನಿಧ್ಯ ಸೇರುವ ಸಮಯ. ಇದೊಂದು ಸಿದ್ಧಿ ಅಲ್ಲದೆ ಮತ್ತೇನೂ ಅಲ್ಲ. ಈ ಸಿದ್ಧಿಗಾಗಿಯೇ ನಾವು ನಮ್ಮ ಜೀವನಪರ್ಯಂತ ತಪಸ್ಸು ಮಾಡುತ್ತ ಬಂದಿರುತ್ತೇವೆ. ನಮ್ಮ ಧರ್ಮ ಮಾರ್ಗ, ನ್ಯಾಯ ಸಮ್ಮತೆ, ಮಾಡಿದ ಪುಣ್ಯಕರ್ಮಗಳು, ಸದಾಚಾರಗಳೇ ನಮ್ಮನ್ನು ಸಿದ್ಧಿದಾತ್ರಿಯ ಕೃಪೆ ಪಡೆಯಲು ಅರ್ಹರನ್ನಾಗಿ ಮಾಡುತ್ತದೆ.
ಆದರೆ ಅಸಲಿನಲ್ಲಿ ನಾವು ಒಂಭತ್ತನೆಯ ದಿನದಂದು ವೃತ್ತತ್ರಯಂಚ ಶಕ್ತಿ ಚಕ್ರವನ್ನು ಆರಾಧಿಸಬೇಕಾಗಿರುತ್ತದೆ ಎಂಬುದನ್ನು ಮನದಲ್ಲಿ ನೆನೆಸಿಕೊಂಡು ಪೂಜಿಸಿದರೆ ಸಾರ್ಥಕ ಮನೋಭಾವ ನಮ್ಮಲ್ಲುಂಟಾಗುತ್ತದೆ.
ಮರುದಿನವೇ ವಿಜಯ ದಶಮಿ ಈ ಒಂಭತ್ತು ದಿನಗಳ ತಪಸ್ಸು ಸಾರ್ಥಕವಾಗಿ ಮಾಡಿ ಮುಗಿಸಿ ವಿಜಯದ ರಥ ಏರುವುದರ ಪ್ರತೀಕವಾಗಿದೆ. ಹೀಗೆ ಒಂಭತ್ತು ದಿನಗಳು ನಮ್ಮ ಜೀವನದ ಆಯಾ ಘಟ್ಟಗಳಲ್ಲಿ ನಮ್ಮನ್ನು ನಾವು ಹೇಗೆಲ್ಲ ಇರಿಸಿಕೊಳ್ಳಬೇಕೆಂಬುದನ್ನು ಸೂಚಿಸುತ್ತ ಪ್ರತಿ ಘಟ್ಟಗಳಲ್ಲಿರುವ ವಿವಿಧ ಶಕ್ತಿಗಳ ಸಾಮರ್ಥ್ಯ ಹೇಗಿರುತ್ತದೆ ಎಂಬುದನ್ನು ಈ ನವದುರ್ಗೆಯರು ನಮಗೆ ತಿಳಿಸಿಕೊಡುತ್ತಾರೆ.
ನವರಾತ್ರಿ ಹಬ್ಬ ನಿಮ್ಮೆಲ್ಲರಿಗೂ ಸನ್ಮಂಗಳವನ್ನುಂಟು ಮಾಡಲಿ……
ಇಂತಹ ಆಸಕ್ತಿಕರ ವಿಡಿಯೊ ನೋಡಲು ಬಯಸಿದ್ದರೆ ನಮ್ಮ ಚಾನೆಲ್ Just Relax Aagi ಕ್ಲಿಕ್ ಮಾಡಿ, ಸಬ್ಸ್ಕ್ರೈಬ್ ಮಾಡಿ ಹಾಗೂ ನಮಗೆ ಇನ್ನಷ್ಟು ಪ್ರೋತ್ಸಾಹ ಹಾಗೂ ಸಹಕಾರ ನೀಡಿ.
