ಕೃಷ್ಣ ಪರಮಾತ್ಮನ ಹುಟ್ಟಿನ ಸಂದರ್ಭವನ್ನು ಹಲವು ಕಾವ್ಯಗಳು, ಪುರಾಣಗಳಲ್ಲಿ ಅದ್ಭುತವಾಗಿ ವಿವರಿಸಲಾಗಿದೆ. ಆ ಹಿನ್ನೆಲೆಯಲ್ಲಿ ನಡೆದ ಘಟನೆಗಳು ರೋಮಾಂಚನಮಯವಾಗಿದ್ದು ಭಕ್ತಿ ಮತ್ತು ಶೃದ್ಧೆಗಳೆಂದರೆ ಹೇಗಿರಬೇಕು ಎಂಬುದನ್ನು ವಸುದೇವನ ಮೂಲಕ ತೋರಿಸಿಕೊಡುತ್ತವೆ.
ಈ ಪ್ರಪಂಚದಲ್ಲಿ ಕೆಲವೇ ಕೆಲವು ಅತಿ ಧೀಮಂತ ಹಾಗೂ ಕಾಲಾತೀತರಾದಂತಹ ವ್ಯಕ್ತಿಗಳು ತಮ್ಮ ಪ್ರಭಾವನ್ನು ಸರ್ವಜನರ ಮಾನಸದಲ್ಲೂ ಪಸರಿಸಿದ್ದಾರೆ. ಭರತ ಖಂಡಕ್ಕೆ ಸಂಬಂಧಿಸಿದಂತೆ ಪ್ರಪಂಚದಲ್ಲೇ ತನ್ನ ಮಾತುಗಳಿಂದ ಸದಾ ಕಾಲದಲ್ಲೂ ಸಲ್ಲಬಹುದಾದ ಜ್ಜಾನವನ್ನು ಪಸರಿಸಿ ಎಲ್ಲ ಜನರ ಮೇಲೂ ಪ್ರಭಾವ ಬೀರಿದಂತಹ ಏಕೈಕ ವ್ಯಕ್ತಿ ಎಂದರೆ ಅದು ಶ್ರೀಕೃಷ್ಣ ಪರಮಾತ್ಮನೆ ಆಗಿದ್ದಾನೆ.
ಅವನೊಬ್ಬ, ಆಡಳಿತಗಾರ, ಕುಶಾಗ್ರಮತಿ, ಶೂರ, ವೀರ, ಪರಾಕ್ರಮಿ, ಧೈರ್ಯವಂತ, ಬುದ್ಧಿವಂತೆ, ಅತ್ಯುತ್ತಮ ಸಂಧಾನಕಾರ, ದಯಾಪರ…ಇವೆಲ್ಲಕ್ಕಿಂತ ಮಿಗಿಲಾಗಿ ಅತಿ ಶ್ರೇಷ್ಠ ಹಾಗೂ ಧರ್ಮಪರ ಸದಾ ನಿಂತ ಅತ್ಯುತ್ತಮ ಹಾಗೂ ಏಕೈಕ ರಾಜಕಾರಿಣಿ ಎಂದರೂ ತಪ್ಪಾಗದು.
ಭೂಮಿಯ ಸಕಲ ಜೀವಿಗಳ ಕಲ್ಯಾಣಕ್ಕಾಗಿ ಸರ್ವಕಾಲಕ್ಕೂ ಸಲ್ಲುವಂತಹ ಜ್ಞಾನಮಯ ಭಗವದ್ಗೀತೆಯನ್ನು ಕೊಟ್ಟ ಮಹಾನುಭಾವ ಶ್ರೀಕೃಷ್ಣ. ನಮ್ಮಲ್ಲಿ ಬಹುತೇಕರಿಗೆ ಕೃಷ್ಣ ಜನಿಸಿದ್ದುದರ ಬಗ್ಗೆ ಕಥೆ ಗೊತ್ತಿದೆ. ಟಿವಿಗಳಲ್ಲಿ ಧಾರಾವಾಹಿಗಳ ರೂಪದಲ್ಲಿ ಕೃಷ್ಣನ ಕಥೆ ಬಂದಿರುವುದರಿಂದ ಅಲ್ಲಿಂದಲೂ ಸಾಕಷ್ಟು ಜನ ತಿಳಿದಿರುತ್ತಾರೆ.
ಆದರೆ, ನಮಗೆ ಕೃಷ್ಣ ದೇವಕಿ ಹಾಗೂ ವಾಸುದೇವನ ಎಂಟನೇಯ ಸಂತಾನ ಹಾಗೂ ಆತ ಸೆರೆಮನೆಯಲ್ಲಿ ಹುಟ್ಟಿದ ಎಂಬ ವಿಚಾರ ಸಾಮಾನ್ಯವಾಗಿ ಗೊತ್ತಿದೆ. ಆದರೆ ಆ ಒಂದು ಸಂದರ್ಭದಲ್ಲಿ ಏನೇನು ಘಟನೆಗಳುಂಟಾದವು, ಅದರ ತೀವ್ರತೆ ಹೇಗಿತ್ತು ಕೃಷ್ಣನ ಆ ಹುಟ್ಟಿಗೆ ಇರುವ ಮಗದೊಂದು ಕಾರಣ ಏನು, ಹಿನ್ನೆಲೆ ಎಂಥದ್ದು ಎಂಬುದನ್ನು ಸೂಕ್ಷ್ಮವಾಗ್ ಗಮನಿಸಿದಾಗ ನಮ್ಮ ಮೈಮನಗಳೆಲ್ಲ ಜುಮ್ ಎನ್ನುವ ಅನುಭವ ಉಂಟಾಗುತ್ತದೆ.
ಹಾಗಾದರೆ ಬನ್ನಿ, ಹಲವು ಮೇಧಾವಿ ಪಂಡಿತರ ಉಪನ್ಯಾಸಗಳು, ಪುರಾಣಗಳು ಹಾಗೂ ಕಾವ್ಯಗಳಲ್ಲಿ ಈ ಬಗ್ಗೆ ವಿವರಿಸಿರುವ ಮಾಹಿತಿಗಳನ್ನು ಕಲೆ ಹಾಕಿ ಸಂಗ್ರಹಿಸಿ ಈ ಲೇಖನದಲ್ಲಿ ಸೂಕ್ಷ್ಮವಾಗಿ ಪ್ರಸ್ತುತಪಡಿಸಲಾಗಿದೆ.
ವಾಮನನಾಗಿ ಹುಟ್ಟಿದ ಸಂದರ್ಭದಲ್ಲಿ
ಒಂದೊಮ್ಮೆ ಕಶ್ಯಪ ಬ್ರಹ್ಮರ್ಷಿಗಳು ಹಾಗೂ ಅವರ ಪತ್ನಿಯಾದಂತಹ ಆದಿತಿ ತಮಗೊಂದು ಸಂತಾನ ಬೇಕೆಂದು ಪ್ರಾರ್ಥಿಸಿದಾಗ ಅವರಿಗೆ ಜನಿಸಿದ್ದವನೆ ವಿಷ್ಣುವಿನ ಅವತಾರವಾದ ವಾಮನ. ಆದರೆ ಚಿಕ್ಕ ವಯಸಿನಲ್ಲೆ ವಾಮನನು ಮಾಡಬೇಕಾದ ಕಾರ್ಯ ಮಹತ್ವವಾಗಿದ್ದರಿಂದ ಪುತ್ರಸೌಖ್ಯವನ್ನು ಕಶ್ಯಪ ಹಾಗೂ ಆದಿತಿಗೆ ಸಿಗಲಿಲ್ಲ.
ಈ ಬಗ್ಗೆ ಕಶ್ಯಪರು ತಮ್ಮ ನೋವನ್ನು ತೋಡಿಕೊಂಡಾಗ ಆಗ ನಾರಾಯಣ ಮುಂದೆ ಕೃಷ್ಣನಾಗಿ ಹುಟ್ಟಿ ಅವರಿಗೆ ಆ ಪುತ್ರಸೌಖ್ಯವನ್ನೂ ನೀಡುವುದಾಗಿ ಹೇಳಿರುತ್ತಾನೆ. ಇದೂ ಸಹ ಕೃಷ್ಣನ ಹುಟ್ಟಿಗೆ ಒಂದು ಕಾರಣ ಎನ್ನಬಹುದು.
ಕಂಸನ ಹಿನ್ನೆಲೆ
ಕೃಷ್ಣನ ಅವತಾರದಲ್ಲಿ ಬರುವ ಪ್ರಮುಖ ಘಟ್ಟಗಳಲ್ಲಿ ಕಂಸನ ಘಟ್ಟವೂ ಸಹ ಒಂದು. ಕಂಸ, ಮಥುರೆ ರಾಜಧಾನಿಯಾಗಿದ್ದ ವೃಷ್ಣಿ ರಾಜ್ಯವನ್ನಾಳುತ್ತಿದ್ದ ಉಗ್ರಸೇನ ಹಾಗೂ ಪದ್ಮಾವತಿಯ ಮಗ. ಮುಂದೆ ತನ್ನ ನಂಬಿಕಸ್ಥರ ಮಾತುಗಳ ಪ್ರಭಾವಕ್ಕೆ ಒಳಗಾಗಿ ತನ್ನ ತಂದೆಯನ್ನೇ ಸಿಂಹಾಸನದಿಂದ ಕಿತ್ತೆಸೆದು ರಾಜ್ಯಭಾರ ಮಾಡಿದ.
ಉಗ್ರಸೇನನ ಸಹೋದರನ ಪುತ್ರಿಯಾದ ದೇವಕಿ ಸಂಬಂಧದಲ್ಲಿ ಕಂಸನಿಗೆ ಒಡಹುಟ್ಟಿಲ್ಲದಿದ್ದರೂ ಸಹೋದರಿಯ ಸ್ಥಾನಮಾನವನ್ನೇ ಹೊಂದಿದ್ದವಳು. ಕೆಲವೆಡೆ ಕಂಸನನ್ನು ಅಸುರ ಎಂದು ಉಲ್ಲೇಖಿಸಲಾಗಿದ್ದರೂ ಇನ್ನು ಕೆಲವೆಡೆ ಅವನನ್ನು ಮಾನವ ರೂಪದಲ್ಲಿದ್ದ ಅಸುರ ಎಂದೂ ಕರೆದಿವೆ. ಒಟ್ಟಿನಲ್ಲಿ ಕಂಸ ನಾವಂದುಕೊಂಡಷ್ಟು ಕ್ರೂರಿಯಾಗಿರಲಿಲ್ಲ.
ಅವನಿಗೆ ದೇವಕಿಯ ಮೇಲೆ ಅಪಾರವಾದ ಸಹೋದರಿ ಪ್ರೀತಿ ಇತ್ತು. ಸ್ವತಃ ವಸುದೇವನ ಜೊತೆ ದೇವಕಿಯ ವಿವಾಹವನ್ನು ವಿಜೃಂಭಣೆಯಿಂದ ನೆರವೇರಿಸಿದ್ದ. ಒಂದೊಮ್ಮೆ ಕಂಸ ಅವರಿಬ್ಬರನ್ನು ತನ್ನ ರಥದಲ್ಲಿ ಕೂರಿಸಿಕೊಂಡು ಸ್ವತಃ ಸಾರಥಿಯಾಗಿ ರಥ ಓಡಿಸುತ್ತಿದ್ದಾಗ ಆಕಾಶದಿಂದ ದೈವಿಕ ಧ್ವನಿಯೊಂದು (ಆಕಾಶವಾಣಿ) ಕೇಳಿತು. ಆ ಪ್ರಕಾರ ಧ್ವನಿಯು ಕಂಸನನ್ನು ಕುರಿತು, “ಹೇ ಕಂಸ ನಿನ್ನ ಸಹೋದರಿಯ ಗರ್ಭದಿಂದ ಜನಿಸುವ ಎಂಟನೇಯ ಮಗುವಿನಿಂದಲೇ ನಿನ್ನ ಸಂಹಾರವಾಗುತ್ತದೆ” ಎಂದು ಮೊಳಗಿತು.
ಇದನ್ನು ಆಲಿಸಿದ ಕಂಸನ ಪಾದಗಳಲ್ಲೇ ಭುಕುಸಿತವಾದಂತಾಯಿತು. ಸ್ವಲ್ಪ ಸಹಿಸಿಕೊಂಡನಂತರ ಅವನಲ್ಲಿ ಕೋಪಾಗ್ನಿಯ ಜ್ವಾಲೆಯೇ ಉರಿಯಿತು. ಯಾರೂ ತಾನೇ ತನ್ನ ಮೃತ್ಯು ಇವನಿಂದ ಎಂದು ಗೊತ್ತಾದರೆ ಸುಮ್ಮನಿರುತ್ತಾರೆ ಹೇಳಿ…ಮೊದಲು ಪ್ರಾಣಕ್ಕೆ ಸಂಚಕಾರ ತರುವಾತನಿಲ್ಲದಿರುವಂತೆ ಮಾಡಲು ಮುನ್ನುಗ್ಗುತ್ತಾರೆ ಅಲ್ಲವೆ…ಅದೇ ರೀತಿ ಕಂಸನಿಗೂ ಹಾಗೆ ಆಯಿತು.
ತನ್ನ ಸಹೋದರಿಯೆಡೆ ಇದ್ದ ಪ್ರೀತಿ ಎಲ್ಲ ಈಗ ತಿರಸ್ಕೃತಗೊಂಡು ಅವಳ ಮೇಲೆ ಕ್ರೋಧ ಉಂಟಾಗಿ ಅವಳ ಶಿರಚ್ಛೇಧ ಮಾಡಲು ಸಜ್ಜಾಗಿಯೇ ಬಿಟ್ಟ. ಆಗ ವಸುದೇವನು ಕಂಸನ ಕಾಲಿಗೆ ಬಿದ್ದು ಅಂಗಲಾಚುತ್ತ, ಕಂಸ ಹೀಗೆ ಮಾಡದಿರು, ಇವಳನ್ನ ಸಾಯಿಸಿದರೆ ಏನು ಬಂತು, ಇವಳ ಎಂಟನೇಯ ಪುತ್ರ ತಾನೆ ನಿನ್ನನ್ನು ವಧಿಸುವುದು, ನನಗಾಗುವ ಎಲ್ಲ ಸಂತಾನಗಳನ್ನು ಆಗುತ್ತಲೇ ನಿನಗೆ ಒಪ್ಪಿಸುತ್ತೇನೆ, ಆದರೆ ಯಾವ ತಪ್ಪು ಮಾಡದ ಇವಳ ಪ್ರಾಣ ತೆಗೆಯದಿರು ಎಂದು ಬೇಡಿಕೊಳ್ಳುತ್ತಾನೆ.
ಸ್ವಲ್ಪ ಹೊತ್ತು ಯೋಚಿಸಿದ ಕಂಸನಿಗೆ ವಸುದೇವ ಹೇಳುತ್ತಿರುವುದು ಸರಿ ಎನಿಸಿ ಅವನಿಗೆ ಅವನು ನುಡಿದಿರುವಂತೆ ಪ್ರತಿ ಬಾರಿ ಅವನಿಗಾಗುವ ಸಂತಾನವನ್ನು ತನಗೆ ಒಪ್ಪಿಸುವ ಕರಾರು ಹಾಕಿ ಅವರಿಬ್ಬರನ್ನು ಅರಮನೆಯ ಗೃಹಬಂಧನದಲ್ಲಿರಿಸಿದ.
ಹೀಗೆ ಕಾಲ ಕಳೆದಂತೆ ವಸುದೇವ ಹಾಗೂ ದೇವಕಿಗೆ ಮೊದಲನೇ ಸಂತಾನವಾಗಿ ವಸುದೇವ ತನ್ನ ಮಾತಿನಂತೆ ಅದನ್ನು ತೆಗೆದುಕೊಂಡು ಹೋಗಿ ಕಂಸನಿಗೆ ಒಪ್ಪಿಸುತ್ತಾನೆ. ಇದರಿಂದ ಕಂಸ ಅತೀವ ಪ್ರಸನ್ನನಾಗಿ ವಸುದೇವನನ್ನು ತನ್ನ ಮಾತನ್ನು ಉಳಿಸಿಕೊಂಡಿರುವುದಕ್ಕೆ ಹೊಗಳುತ್ತಾನೆ. ಕಂಸನಿಗೆ ದೇವಕಿಗೆ ಜನಿಸುವ ಎಂಟನೇ ಮಗು ಮುಖ್ಯವಾಗಿದ್ದ ಕಾರಣ ದಯೆ ತೋರಿಸುತ್ತ ಮೊದಲ ಮಗುವನ್ನು ಏನೂ ಮಾಡದೆ ಬಿಟ್ಟು ಬಿಡುತ್ತಾನೆ.
ಎರಡನೇಯ ಮಗು ಆಗಿ ಆಗಲೂ ವಸುದೇವ ಅದನ್ನು ಕಂಸನಿಗೆ ಒಪ್ಪಿಸಿದಾಗ ಆಗಲೂ ಕಂಸ ಪ್ರಸನ್ನನಾಗಿ ಆ ಮಗುವನ್ನೂ ಬಿಟ್ಟು ಬಿಡುತ್ತಾನೆ. ಹೀಗೆ ಸಮಯ ಸಾಗುತ್ತಿರುವಾಗ ಒಂದೊಮ್ಮೆ ನಾರದ ಮಹಾಮುನಿಗಳು ಕಂಸನ ಆಸ್ಥಾನಕ್ಕೆ ಬಂದು ಕುಶಲೋಪರಿ ವಿಚಾರಿಸುತ್ತಾರೆ. ಕಂಸನು ಲೋಕಾಭಿರಾಮವಾಗಿ ಮಾತನಾಡುತ್ತ ದೇವಲೋಕದ ಸುದ್ದಿಯ ಬಗ್ಗೆ ಕೇಳುತ್ತಾನೆ.
ಒಲ್ಲದ ಮನಸ್ಸಿನಿಂದ ನಾರದರು ಅವನಿಗೆ ದೇವತೆಗಳು ನಿನ್ನ ವಧೆ ದೇವಕಿಯ ಎಂಟನೇಯ ಸಂತಾನದಿಂದ ಆಗುವುದಾಗಿ ಮಾತನಾಡಿಕೊಳ್ಳುತ್ತಿದ್ದಾರೆ ಎಂದು ಹೇಳುತ್ತ, ಕೊನೆಯದಾಗಿ ದೇವತೆಗಳನ್ನು ನಂಬುವುದು ಅಷ್ಟು ಸುಲಭವಾದ ಮಾತಲ್ಲ, ಅವರು ಹಿಂದೆ ಅನೇಕ ಬಾರಿ ತಮಗೊಳಿತಾಗ ಬೇಕೆಂದು ಸುಳ್ಳು ಹೇಳಿದ್ದಾರೆ, ಯಾರಿಗೆ ಗೊತ್ತು ಎಂಟನೇಯ ಸಂತಾನವೇ ನಿನ್ನನ್ನು ವಧಿಸುವುದು ಎಂಬುದರಲ್ಲಿ ಸತ್ಯವಿರಬೇಕಲ್ಲ ಎಂದು ಕಂಸನಲ್ಲಿ ಸಂದೇಹ ಮೂಡಿಸುವ ರೀತಿಯಲ್ಲಿ ಮಾತಾಡಿ ತೆರಳುತ್ತಾರೆ.
ಈಗ ಕಂಸನಿಗ್ಗೆ ನಿಜಕ್ಕೂ ಸಂದೇಹ ಬಲಿಷ್ಠವಾಗುತ್ತದೆ. ಹೌದು, ನಾರದರು ಹೇಳಿರುವಂತೆ ದೇವತೆಗಳನ್ನು ನಂಬಲು ಸಾಧ್ಯವಿಲ್ಲ ಎಂದು ನಿರ್ಣಯಿಸಿ ಈಗಾಗಲೇ ಬಿಟ್ಟಿದ್ದ ಎರಡೂ ಸಂತಾನಗಳ ವಧೆ ಮಾಡುತ್ತಾನೆ ಹಾಗೂ ವಸುದೇವ ಮತ್ತು ಜಾನಕಿಯರನ್ನ ಸೆರೆಮನೆಯಲ್ಲಿ ಬಂಧಿಸಿಡುತ್ತಾನೆ. ಅದನ್ನು ಕಾಯುವ ಕಾವಲುಗಾರರು ಪ್ರತಿ ಬಾರಿ ಅವರಿಬ್ಬರಿಗೆ ಸಂತಾನವಾದಾಗ ಆ ಬಗ್ಗೆ ಕಂಸನಿಗೆ ಹೇಳಬೇಕಾಗಿರುತ್ತದೆ.
ಕಥೆಯಲ್ಲಿ ನಾಟಕೀಯ ತಿರುವು
ಹೀಗೆ ಮುಂದೆ ಆಗುವ ಪ್ರತಿ ಸಂತಾನಗಳನ್ನು ಕಂಸ ಸೆರೆಮನೆಗೆ ಬಂದು ವಧಿಸಿ ಹೋಗುತ್ತಿರುತ್ತಾನೆ. ಈ ರೀತಿಯಾಗಿ ಕಂಸ ಆರು ಮಕ್ಕಳನ್ನು ಕೊಂದು ಹಾಕಿದ್ದಾನೆ. ಈಗ ಏಳನೇಯ ಮಗು ಜನಿಸಬೇಕಾದ ಕಾಲ ಬಂದಿದೆ. ಈ ಸಂದರ್ಭದಲ್ಲಿ ವೈಕುಂಠವಾಸಿ ವಿಷ್ಣುವು ಯೋಗಮಾಯೆಯನ್ನು ಕರೆಯುತ್ತಾನೆ. ಯೋಗಮಾಯೆ ಎಂದರೆ ಸಾಕ್ಷಾತ ಲಲಿತಾ ತ್ರಿಪುರ ಸುಂದರಿ.
ಯೋಗಮಾಯೆಯನ್ನುದ್ದೇಶಿಸಿ ವಿಷ್ಣು ಈ ರೀತಿ ನುಡಿಯುತ್ತಾನೆ. “ಈಗ ದೇವಕಿಯ ಗರ್ಭದಲ್ಲಿ ನನ್ನ ಶಕ್ತಿಯ ಅಂದರೆ ಶೇಷನಾಗನ ಶಕ್ತಿಯ ಒಂದು ಅಂಶ ರೂಪ ಪಡೆದಿದೆ. ನೀನು ಆ ಗರ್ಭವನ್ನು ಆಕರ್ಷಿಸಿ ಅಂದರೆ ಕರ್ಷಣ ಮಾಡಿ ಆ ಆಕಾರವನ್ನು ಗೋಕುಲದ ನಂದನ ಬಳಿ ನೆಲೆಸಿರುವ ವಸುದೇವನ ಇನ್ನೊಬ್ಬನ ಪತ್ನಿಯಾದ (ವಸುದೇವನಿಗೆ ಒಟ್ಟು ಹತ್ತು ಪತ್ನಿಯರಿರುತ್ತಾರೆ) ರೋಹಿಣಿ ಅದನ್ನು ಗರ್ಭಧರಿಸುವಂತೆ ಮಾಡು.
ಮೊದಲು ಈ ಕೆಲಸವನ್ನು ಮುಗಿಸು, ತದನಂತರ ಇನ್ನೊಂದು ವರ್ಷದಲ್ಲಿ ನೀನು ಮಾಡಬೆಕಾಗಿರುವ ಮತ್ತೊಂದು ಕೆಲಸವನ್ನು ಹೇಳುತ್ತೇನೆ” ಎಂದನು. ಈಗ ದೇವಕಿಯ ಏಳನೇ ಸಂತಾನ ಬದುಕದೆ ರಕ್ತ ಸ್ರಾವವಾಗಿ ಅಳಿದು ಹೋದ ವಿಚಾರ ಕಂಸನಿಗೆ ಭಟರಿಂದ ಸಿಕ್ಕಿತು. ಕಂಸ ಅದನ್ನು ಕೇಳಿ ಭಟರಿಗೆ ಮುಂದೆ ಜನಿಸುವುದೇ ಎಂಟನೇ ಸಂತಾನ ಅದು ಆಗುತ್ತಿದ್ದ ಹಾಗೆ ಮೊದಲು ತಿಳಿಸಿ ಎಂದು ಹೇಳಿ ಕಳುಹಿಸಿದ.
ಅಂದರೆ ಇಲ್ಲಿ ದೇವಕಿಗಾಗಿದ್ದ ಆ ಏಳನೆಯ ಮಗು ಯಾವುದು? ಸ್ವತಃ ವಿಷ್ಣುವಿನ ಶಕ್ತಿ ಹಾಗೂ ಶೇಷನ ಸ್ವರೂಪವಾದ ಆ ಮಗುವಾದರೂ ಯಾರು ಎಂಬ ಪ್ರಶ್ನೆ ಬರುತ್ತದೆ. ಅದಕ್ಕೆ ಉತ್ತರವೆಂದರೆ ಅವನೇ ಸಂಕರ್ಷಣ ತಥಾತ್ ಬಲರಾಮ, ಕೃಷ್ಣನ ಅಣ್ಣ.
ಯೋಗಮಾಯೆಯ ಮುಂದಿನ ಕಾರ್ಯ
ಇನ್ನೇನು, ಎಂಟನೆಯ ಮಗು ಜನಿಸಬೆಕಾಗಿದ್ದ ಸಂದರ್ಭ ಬರುತ್ತಿದ್ದಂತೆ, ವಿಷ್ಣು ಮತ್ತೆ ಯೋಗಮಾಯೆಯನ್ನು ಕರೆದು ಹೀಗೆ ಹೇಳಿದ, “ಈಗ ಎಂಟನೇಯ ಮಗು ಹುಟ್ಟು ಸಮಯ ಬಂದಿದೆ. ನೀನು ಗೋಕುಲದಲ್ಲಿರುವ ನಂದ ಹಾಗೂ ಯಶೋಧೆಗೆ ಮಗಳಾಗಿ ಹುಟ್ಟು ಮತ್ತು ನಾನು ವಸುದೇವ ಹಾಗೂ ದೇವಕಿಗೆ ಮಗನಾಗಿ ಹುಟ್ಟುವೆ, ಇಬ್ಬರ ಜನನ ಒಂದೇ ಸಮಯದಲ್ಲಾಗಬೇಕು. ಮತ್ತು ಆ ದಿನ ರಾತ್ರಿ ಸುಮಾರು ಹನ್ನೆರಡು ಗಂಟೆಯ ಸಮಯದಲ್ಲಿ ಅಲ್ಲಿದ್ದ ಯಾರೂ ಎಚ್ಚರಗೊಳ್ಳದಂತೆ ಮಾಡಿ ಮನೆಯ ಬಾಗಿಲು ತೆರೆದಿಟ್ಟಿರುವಂತೆ ನೋಡಿಕೊ” ಎಂದನು.
ಶ್ರೀಕೃಷ್ಣನ ಜನನ
ಈಗ ಸೆರೆಮನೆಯಲ್ಲಿ ಕೃಷ್ಣ ಜನಿಸುವ ಸಮಯ. ಪುರಾಣಗಳಲ್ಲಿ ಉಲ್ಲೇಖಿಸಿರುವಂತೆ ಆ ಒಂದು ಸಮಯ ಕೃಷ್ಣ ಹುಟ್ಟುವಾಗ ಏನೋ ಒಂದು ರೀತಿಯ ಮನಶ್ಶಾಂತಿ ನೀಡುವಂತಹ ಸಮಯ. ಎಲ್ಲೆಡೆ ಪ್ರಶಾಂತತೆ ಆವರಿಸಿದೆ. ಸುವಾಸನೆಯುಕ್ತ ವಾತಾವರಣ ಅದಾಗಿದೆ, ಸುಖಪೂರ್ಣವಾದ ಪ್ರಸವ ದೇವಕಿಗಾಗುತ್ತದೆ. ಹುಟ್ಟಿದ ಮಗು ದಿವ್ಯ ತೇಜಸ್ಸಿನಿಂದ ಕೂಡಿದ್ದು ನಾಲ್ಕು ಕೈಗಳನ್ನು ಹೊಂದಿದೆ.
ಅಳುವೇ ಇಲ್ಲದೆ ತೋಜೋಮಯವಾಗಿ ನಗುತ್ತ ಆ ಮಗು ಕುಳಿತಿದೆ. ಈ ದೃಶ್ಯವನ್ನು ಕಂಡ ವಸುದೇವ ಹಾಗೂ ದೇವಕಿ ಆಶ್ಚರ್ಯಚಕಿತರಾಗಿದ್ದಾರೆ. ಮೌನವಾಗಿದ್ದಾರೆ, ಏನೂ ಮಾತನಾಡದಂತವರಾಗಿದ್ದಾರೆ. ಹೀಗಿರುವಾಗ ಆ ಮಗು ತನ್ನ ಮಧುರವಾದ ಗಾಂಭೀರ್ಯತೆಯ ಕಂಠದಿಂದ ಅವರಿಬ್ಬರನ್ನು ಉದ್ದೇಶಿಸಿ ನಿಮ್ಮಿಬರಿಗೂ ನಾನು ಯಾರು ಹಾಗೂ ನಿಮ್ಮ ಹಿಂದಿನ ಜನ್ಮಗಳ ಸ್ಮರಣೆ ಇದೆಯೆ ಎಂದು ಕೇಳುತ್ತದೆ.
ತದನಂತರ ಆ ಸಾಕ್ಷಾತ್ ವಿಷ್ಣು ವಸುದೇವ ಹಾಗೂ ದೇವಕಿಗೆ ಹಿಂದೆ ವಾಮನ ಜನ್ಮ ಮತ್ತು ಅವರಿಬ್ಬರು ಏನಾಗಿದ್ದರು ಎಂದು ಹೇಳಿ, ವಸುದೇವನಿಗೆ ಮಾಡಬೇಕಾದ ಕಾರ್ಯವನ್ನು ವಿವರವಾಗಿ ಹೇಳಿ ಮತ್ತೇ ಸಹಜ ಮಗುವಿನ ರೂಪ ತಾಳುತ್ತಾನೆ ಕೃಷ್ಣ.
ವಸುದೇವನ ಕೆಲಸ
ಈಗ ವಸುದೇವನಿಗೆ ತಾನು ಏನು ಮಾಡಬೇಕೆಂದು ತಿಳಿದಿದೆ. ಆದರೆ ಸುತ್ತಲೂ ಭಟರಿದ್ದಾರೆ, ಏನು ಮಾಡಬೇಕು ಎಂದು ತಿಳಿದಿದೆಯೇ ಹೊರತು ಎಲ್ಲಿಗೆ ಹೋಗಬೇಕು ಎಂಬುದು ಗೊತ್ತಿಲ್ಲ. ಆದರೆ ಸಾಕ್ಷಾತ್ ಭಗವಂತನೇ ಹೇಳಿರುವುದರಿಂದ ಅವನಿಗೆ ಚಿಂತೆಯಿಲ್ಲ, ಆ ಪರಮಾತ್ಮನಲ್ಲಿ ಶತಪ್ರತಿಶತ ನಂಬಿಕೆಯಿಟ್ಟು ತಾನು ಮಾಡಬೇಕಾದ ಕರ್ಯಕ್ಕೆ ಸಜ್ಜಾಗಿ ಬುಟ್ಟಿಯಲ್ಲಿ ಮಗುವಾಗಿರುವ ಕೃಷ್ಣನನ್ನು ಇಟ್ಟು ನಡೆಯುತ್ತಾನೆ.
ಭಟರು ಹಿಡಿಯಬಹುದೆಂಬ ಚಿಂತೆಯಿದ್ದರೂ ಅವನ ನಂಬಿಕೆಯೇ ಪ್ರಧಾನವಾಗಿರುತ್ತದೆ. ಅಂತೆಯೇ ಅವನ ಕೈಕೊಳಗಳು ತಾನಾಗಿಯೇ ಕಳಚುತ್ತವೆ, ಸೆರೆಮನೆಗಳ ದ್ವಾರ ತೆರೆಯುತ್ತದೆ, ಅಲ್ಲಿದ್ದ ಸೈನಿಕರೆಲ್ಲರೂ ಗಾಢ ನಿದ್ದೆಗೆ ಜಾರಿದ್ದಾರೆ. ಇದನ್ನು ಗಮನಿಸುತ್ತ ವಸುದೇವ ಮುಂದೆ ಮಗುವನ್ನು ತೆಗೆದುಕೊಂಡು ಸಾಗುತ್ತಾನೆ.
ಹೊರಗೆ ಘೋರ ರಾತ್ರಿ, ಅದರಲ್ಲೂ ವಿಶೇಷವಾಗಿ ಗುಡುಗು ಸಿಡಿಲುಗಳ ಮಧ್ಯೆ ಭೋರ್ಗೆರೆದು ಬೀಳುತ್ತಿರುವ ಭಯಂಕರ ಮಳೆ. ಆದರೆ ಅತಿ ದೊಡ್ಡದೊಂದು ಸರ್ಪ ತನ್ನ ಹೆಡೆ ಬಿಚ್ಚಿ ವಸುದೇವನಿಗಾಗಿಯೇ ಕಾಯುತ್ತಿರುವಂತೆ ಅರಮನೆಯ ದ್ವಾರದ ಹೊರಗೆ ಕಾಯುತ್ತಿದೆ.
ಇದನ್ನು ನೋಡಿದ ವಸುದೇವ ತಬ್ಬಿಬ್ಬಾಗುತ್ತಾನೆ. ಆದರೆ ದೈವಬಲದ ಮೇಲೆ ವಿಶ್ವಾಸ ಹೊಂದಿದ್ದ ಕಾರಣ ಏನೇ ಆದರೂ ತಾನು ಅನುಭವಿಸಲು ಸಜ್ಜಾಗಿ ಮುಂದೆ ಸಾಗುತ್ತಾನೆ. ಅಚ್ಚರಿಯಂತೆ ಆ ಸರ್ಪವು ಆ ಮಗುವಿನ ಮೇಲೆ ನೀರ ಹನಿಗಳು ಬೀಳದಂತೆ ತನ್ನ ಹೆಡೆಯನ್ನು ಆವರಿಸಿ ರಕ್ಷಿಸುತ್ತ ಸಾಗುತ್ತದೆ. ವಸುದೇವ ತನಗೆ ತಿಳಿದಂತೆ ದೇವರ ಮೇಲೆ ಭಾರ ಹಾಕಿ ಮುಂದೆ ಸಾಗುತ್ತಾನೆ.
ಕೆಲ ಸಮಯದ ನಂತರ ಅವನಿಗೆ ಅಡ್ಡಲಾಗಿದ್ದು ಉಕ್ಕಿ ಭಯಂಕರವಾಗಿ ಹರಿಯುತ್ತಿರುವ ಯಮುನಾ ನದಿ. ಈ ನದಿಯನ್ನು ದಾಟಿ ವಸುದೇವ ಮುಂದೆ ಸಾಗಬೇಕಾಗಿದೆ. ಅದರೆ ಅಂತಹ ಘೋರ ರಾತ್ರಿ ಸಮಯ, ಸಿಡಿಲುಗಳ ಅಬ್ಬರ, ಉಕ್ಕಿ ಹರಿಯುತ್ತಿರುವ ಯಮುನೆ ಅದರಲ್ಲಿ ಸಾಗಬೇಕು ಎಂದರೆ ತಮಾಷೆಯೆ…ನೆನೆಸಿಕೊಳ್ಳಲೂ ಭಯ ಪಡುವಂತಹ ದೃಶ್ಯ ಅದಾಗಿರುವಾಗ ಆ ನದಿಯಲ್ಲಿ ಸಾಗಬೇಕು.
ವಸುದೇವನ ಮನದಲ್ಲಿ ಒಂದೇ ಚಿಂತೆ, ನಾನು ಈ ಕಾರ್ಯ ಮಾಡಲೇಬೇಕು, ಎಲ್ಲವನ್ನೂ ಆ ಭಗವಂತನೇ ನೋಡಿಕೊಳ್ಳುತ್ತಾನೆ. ಅದರಂತೆ ಅವನು ನದಿಯಲ್ಲಿ ಕಾಲಿಟ್ಟು ಮುಂದೆ ಸಾಗಿದ. ಮೊದಲು ಪಾದಗಳಷ್ಟೆ ಮುಳುಗಿತ್ತು ಮುಂದೆ ಸಾಗುತ್ತ ಆ ನೀರು ಮೊಣಕಾಲಿನವರೆಗೂ ನಂತರ ಸೊಂಟದವರೆಗೂ, ಎದೆಯವರೆಗೂ ಹಾಗೂ ಬಾಯಿಯವರೆಗೂ ಬಂದಿತು.
ಏನೂ ಆಗುತ್ತಿಲ್ಲ, ಹೀಗೆ ಮುಂದುವರೆದರೆ ತನ್ನ ಬಾಯಿ, ಮೂಗುಗಳೆಲ್ಲ ನೀರು ಸೇರಿ ತನ್ನ ಪ್ರಾಣ ಹೋಗಬಹುದೆಂದು ಕೊಂಚ ಹೆದರಿಕೆ ವಸುದೇವನಿಗೆ ಆಯಿತಾದರೂ ಆ ಹೆದರಿಕೆ ಅವನು ಭಗವಂತನಲ್ಲಿಟ್ಟಿದ್ದ ವಿಶ್ವಾಸದ ಗೋಡೆಯನ್ನು ಕೆಡವಲು ಸಾಧ್ಯವಾಗಲಿಲ್ಲ.
ಇದೇ ನೋಡಿ ಭಕ್ತಿ, ಬದ್ಧತೆ, ಸಮರ್ಪಣೆ ಹಾಗೂ ಶೃದ್ಧೆಯ ಮಹಿಮೆ. ದೇವರು ನಮ್ಮನ್ನು ನಮ್ಮಲ್ಲಿರುವ ಸಮರ್ಪಣಾ ಭಾವ, ಬದ್ಧತೆ ಹಾಗೂ ನಂಬಿಕೆ ಎಷ್ಟು ಸದೃಢವಾಗಿದೆ ಎಂದು ಪರೀಕ್ಷಿಸುತ್ತಲೇ ಇರುತ್ತಾನೆ. ಅದು ಗಟ್ಟಿಯಾಗಿದ್ದೇ ಆದಲ್ಲಿ ನಮಗೆ ಎದುರಾಗುವ ಕಠಿಣಾತೀಕಠಿಣ ಸಮಸ್ಯೆಗಳು ಮಂಜಿನಂತೆ ಕರಗಿ ಹೋಗುತ್ತವೆ ಎನ್ನುವುದರಲ್ಲಿ ಸಂದೇಹವೇ ಇಲ್ಲ ಎಂಬುದನ್ನು ಈ ಪ್ರಸಂಗ ತೋರಿಸಿಕೊಡುತ್ತದೆ.
ಹೀಗೆ ವಸುದೇವ ಸಾಗುತ್ತಿರುವಾಗ ಬುಟ್ಟಿಯೊಳಗಿದ್ದ ಮಗುವಿನ ರೂಪದ ಕೃಷ್ಣನ ಕಾಲುಗಳು ಬುಟ್ಟಿಯಿಂದಾಚೇ ಚಾಚಿ ಯಮುನೆಯ ಸ್ಪರ್ಶಕ್ಕೆ ಬಂದಿದ್ದೆ ತಡ, ಹರಿಯುತ್ತಿರುವ ಯಮುನೆ ಒಂದೆಡೆ ನಿಂತು ದೊಡ್ಡದಾಗಿ ಗೋಡೆಯಂತೆ ಎತ್ತರಕ್ಕೆ ಬೆಳೆಯುತ್ತ ಸಾಗುತ್ತಾಳೆ ಇನ್ನೊಂದೆಡೆ ಈಗಾಗಲೇ ಅಲ್ಲಿದ್ದ ನೀರು ಮುಂದೆ ಹರಿದು ಹೋಗಿದ್ದರಿಂದ ಭೂತಳವು ಕಾಣುತ್ತಿದೆ, ದಾರಿ ಕಾಣುತ್ತಿದೆ.
ಹೀಗೆ ವಸುದೇವನು ಮಾಡಬೇಕಾದ ಕಾರ್ಯದಂತೆ ನಂದನ ಬಳಿ ಹೋಗಿ ಅಲ್ಲಿ ಯಶೋಧೆಯು ಹೆತ್ತಿದ್ದ ಹೆಣ್ಣು ಮಗುವನ್ನು ಪಡೆದು ಅಲ್ಲಿ ಕೃಷ್ಣನನ್ನು ಇರಿಸಿ ಹೇಗೆ ಸಾಗಿದ್ದನೋ ಹಾಗೆಯೇ ಬಂದ. ಇತ್ತ ಬಂದ ಮೇಲೆ ಯಥಾ ಸ್ಥಿತಿಯಂತೆ ಅವನ ಕೈಗಳಿಗೆ ಮತ್ತೆ ಕೊಳ ತೊಡಿಸಲ್ಪಟ್ಟಿವೆ. ಮಗು ಅಳುತ್ತಿದೆ. ಭಟರು ನಿದ್ದೆಯಿಂದೆದ್ದಿದ್ದು ಮೊದಲಿನ ಹಾಗೆಯೇ ಏನೂ ಗೊತ್ತಿಲ್ಲದಂತೆ ವರ್ತಿಸುತ್ತಿದ್ದಾರೆ. ಸೆರೆಮನೆ ದ್ವಾರಗಳು ಮುಂಚಿನಂತೆಯೇ ಬೀಗ ಜಡಿದುಕೊಂಡಿವೆ.
ಕೆಲ ಸಮಯದ ಹಿಂದೆ ಯಾವುದು ನಡೆಯುವುದು ಅಸಾಧ್ಯ ಎನ್ನುವಂತಿತ್ತೋ ಅದೆಲ್ಲವೂ ಬಿಸಿಗೆ ತುಪ್ಪ ಕರುಗುವ ಹಾಗೆ ಸುಲಭವಾಗಿ ಕರಗಿ ಹೋಗಿದೆ. ಇದನ್ನೇ ದೈವ ಪವಾಡ ಎನ್ನಬಹುದು. ಭಗವಂತನ ಮೇಲೆ ನಮ್ಮ ನಂಬಿಕೆ ಗಟ್ಟಿಯಾಗಿದ್ದೇ ಆದಲ್ಲಿ ನಮಗೆ ಬರುವ ಸಮಸ್ಯೆ ಕಾರ್ಪಣ್ಯೆಗಳೂ ಸಹ ಸುಲಭವಾಗಿ ಕರಗಿ ಹೋಗುತ್ತವೆ ಎಂಬುದಕ್ಕೆ ಈ ಒಂದು ಹಿನ್ನೆಲೆ ಸಾಕ್ಷಿಯಾಗುತ್ತದೆ.
We would like you to subscribe to our channel Just Relax Aagi for wonderful and informative videos.
