Hayli Gubbi Volcano ಅಥವಾ ಜ್ವಾಲಾಮುಖಿಯು ನವಂಬರ್ 23 ರಂದು ಆಫ್ರಿಕಾ ಖಂಡದ ಇಥಿಯೋಪಿಯಾ ದೇಶದಲ್ಲಿ ಸ್ಫೋಟಗೊಂಡಿದ್ದು ಅದರಿಂದ ಹೊರಹೊಮ್ಮಿರುವ ಬೂದಿಯು ಇದೀಗ ಉತ್ತರ ಭಾರತದಲ್ಲಿ ವ್ಯಾಪಿಸಿದೆ.
ಹಲವಾರು ಮಿಲಿಯನ್ ವರ್ಷಗಳ ಹಿಂದೆ ಆಳ ಆಗಸದಿಂದ ಭೂಮಿಯೆಡೆ ಬಂದ ಉಲ್ಕಾಪಿಂಡಗಳಿಂದಾಗಿ ಭೂಮಿಯ ಮೇಲಿನ ಡೈನೋಸಾರ್ ಗಳಂತಹ ಹಲವು ದೈತ್ಯ ಜೀವಿಗಳು ನಿರ್ನಾಮವಾದವು ಎಂಬುದು ನಮಗೆ ವಜ್ಜಾನಿಕವಾಗಿ ಮಾಡಲಾದ ಅಧ್ಯಯನಗಳಿಂದ ತಿಳಿದುಬಂದಿದೆ.
ಅಂದರೆ, ನಾವು ಮನುಷ್ಯರು ಭೂಮಿಯ ಮೇಲೆ ಸದ್ಯ ಇರದಂತೆ ಮಾಡಬಹುದಾದ ಯಾವುದಾದರೂ ಶಕ್ತಿ ಇದೆ ಎಂದರೆ ಅದು ಉಲ್ಕಾಪಿಂಡಗಳ ಅಪ್ಪಳಿಸುವಿಕೆ, ಅಥವಾ ಮಂಜುಗಡ್ಡೆಗಳೆಲ್ಲವು ಕರಗಿ ಸಾಗರದ ನೀರೆಲ್ಲ ಭೂಮಿಯ ಮೇಲೆ ಬಂದಾಗ ಅಥವಾ ಕೊನೆಯ ಪಕ್ಷ ಜಾಗತಿಕವಾಗಿ ದೊಡ್ಡ ಪ್ರಮಾಣದಲ್ಲಿ ಅಣು ಬಾಂಬುಗಳು ಪ್ರಯೋಗಿಸಲ್ಪಟ್ಟಾಗ ಎಂದುಕೊಳ್ಳಬಹುದು.
ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಮೇಲಿನ ಯಾವ ಸಾಧ್ಯತೆಗಳು ಶೀಘ್ರದಲ್ಲೇ ಸಂಭವಿಸಲಿವೆ ಎಂಬುದಂತು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಆದರೆ ಇಲ್ಲಿ ವಿವರಿಸಿದ ಕಾರಣಗಳ ಹೊರತಾಗಿಯೂ ಇನ್ನೊಂದು ಶಕ್ತಿಯು ಸಹ ಮಾನವನ ಉಳಿಯುವಿಕೆಗೆ ಸವಾಲೆಸೆಯಬಹುದು ಹಾಗೂ ಅದುವೇ ಅಗಾಧ ಪ್ರಮಾಣದಲ್ಲಿ ಜ್ವಾಲಾಮುಖಿಗಳ ಸ್ಫೋಟ.
ಕಲ್ಪಿಸಿಕೊಳ್ಳಿ, ಪ್ರಪಂಚಾದ್ಯಂತ ಇರುವ ಎಲ್ಲ ಜ್ವಾಲಾಮುಖಿಗಳು ಅಗಾಧ ಪ್ರಮಾಣದಲ್ಲಿ ಒಮ್ಮೆಲೆ ಸ್ಫೋಟಗೊಂಡರೆ ಏನಾದಿತು? ಅದರಿಂದ ಹೊರಹೊಮ್ಮುವ ಗಾಢವಾದ ಬೂದಿ ಮುಚ್ಚಿದ ಮೋಡಗಳು ಸೂರ್ಯನ ಕಿರಣಗಳೇ ಭೂಮಿಗೆ ಬೀಳದಂತೆ ತಡೆಯಬಲ್ಲವು ಅದು ದೀರ್ಘಾವಧಿಯವರೆಗೆ. ಹೀಗಾದಾಗ ಭೂಮಿಯ ಮೇಲಿನ ಜೀವಶಕ್ತಿಯು ಸೂರ್ಯನ ಶಕ್ತಿಯ ಮೇಲೆ ಅದೆಷ್ಟು ಅವಲಂಬಿತವಾಗಿದೆ ಎಂಬುದು ಸ್ಪಷ್ಟವಾಗುತ್ತದೆ.
ಆದರೆ, ಹೀಗಾಗುವುದು ಸಹ ಸದ್ಯದಲ್ಲಿ ಅನಪೇಕ್ಷಿತ. ಆದಾಗ್ಯೂ ಜ್ವಾಲಾಮುಖಿಯೊಂದರ ಸ್ಫೋಟದ ನಂತರದ ತೀವ್ರತೆ ಹಾಗೂ ಅದು ಏನೆಲ್ಲ ಮಾಡಬಹುದು ಎಂಬುದಕ್ಕೆ ಇಥಿಯೋಪಿಯಾದ ಹಾಯ್ಲಿ ಗುಬ್ಬಿ ಜ್ವಾಲಾಮುಖಿ ಸ್ಫೋಟ ಒಂದು ಉದಾಹರಣೆಯಾಗಿ ನಿಲ್ಲುತ್ತದೆ.
ಹೌದು, ಆಫ್ರಿಕಾ ಖಂಡದ ಇಥಿಯೋಪಿಯಾ ದೇಶದಲ್ಲಿರುವ ಹಾಯ್ಲಿ ಗುಬ್ಬಿ ಕಳೆದ ಹನ್ನೆರಡು ಸಾವಿರ ವರ್ಷಗಳಿಂದ ನಿಷ್ಕಿಯವಾಗಿತ್ತು. ಆದರೆ ನವಂಬರ್ ೨೩ ರಂದು ಇದು ಅಚಾನಕ್ಕಾಗಿ ಹೊಗೆ ಉಗುಳಲು ಆರಂಭಿಸಿದಾಗ ವಿಜ್ಜಾನಿಗಳೂ ಅಚ್ಚರಿ ಪಡುವಂತಾಯಿತು.
ಈ ಜ್ವಾಲಾಮುಖಿಯ ಹೊಗೆ ಅಥವಾ ಕಾರ್ಮೋಡವು ನೆಲದಿಂದ 40,000 ಅಡಿಗಳಷ್ಟು ಎತ್ತರದಲ್ಲಿ ಆವರಿಸಿ ಅದು ಕ್ರಮೇಣ ಗಾಳಿಯ ಬಲದೊಂದಿಗೆ ಯೆಮೆನ್ ದೇಶ ವ್ಯಾಪಿಸಿ ನಂತರ ಅರಬ್ಬಿ ಸಮುದ್ರದ ಮೂಲಕ ಗುಜರಾತ್, ರಾಜಸ್ಥಾನ, ಹರಿಯಾಣ ಹಾಗೂ ದೆಹಲಿ ಮೂಲಕ ಭಾರತ ತಲುಪಿ ಈಗ ಮುಂದೆ ಸಾಗುತ್ತಿದೆ.
ಈ ಬಗ್ಗೆ ನಿಗಾವಹಿಸಿದ್ದ ಭಾರತ ಸರ್ಕಾರವು ಅದಾಗಲೇ ಭಾರತದಲ್ಲಿ ಇದು ಪೀಡಿತವಾಗಿರುವ ಪ್ರದೇಶಗಳಲ್ಲಿ ವಿಮಾನ ಹಾರಾಟಗಳನ್ನು ರದ್ದುಗೊಳಿಸಿತ್ತು. ಈ ದಪ್ಪ ಬೂದಿಯ ಮೋಡಗಳು ಮುಂದೆ ಚೀನಾ ಹಾಗೂ ಜಪಾನ್ ತಲುಪುವ ಹೆಚ್ಚಿನ ಸಾಧ್ಯತೆಯಿದೆ ಎನ್ನಲಾಗಿದೆ.
ಹಿಂದೊಮ್ಮೆ ನಡೆದಿತ್ತು ಇಂತಹ ಸ್ಫೋಟ
ಐತಿಹಾಸಿಕವಾಗಿ ದಾಖಲಿಸಲಾದ ದಾಖಲೆಗಳ ಪ್ರಕಾರ ಹಿಂದೆ ಅಂದರೆ ಸುಮಾರು 75,000 ವರ್ಷಗಳ ಹಿಂದೆ ಪ್ರಸ್ತುತ ಇಂಡೋನೇಷಿಯಾದಲ್ಲಿದ್ದ ಸೂಪರ್ ವೊಲ್ಕ್ಯಾನೊ ಟೋಬಾ ಇದೇ ರೀತಿ ಸ್ಫೋಟಿಸಿತ್ತು. ಪ್ರಸ್ತುತ, ಈಗ ಅಲ್ಲಿದ್ದ ಜ್ವಾಲಾಮುಖಿ ಮಾಯವಾಗಿದ್ದು ಅದು ಕೇವಲ ಟೋಬಾ ಸರೋವರವಾಗಿ ಉಳಿದಿದೆ. ಈ ಬಗ್ಗೆ ಭುಗೋಳ ವಿಜ್ಜಾನಿಗಳು ಈಗಾಗಲೇ ಮಾಹಿತಿ ದಾಖಲಿಸಿದ್ದಾರೆ.
ಅಷ್ಟಕ್ಕೂ ಇದು ಸ್ಫೋಟಗೊಂಡಿದ್ದಾಗ ಭಾರತ ಸಹಿತ ಸಂಪೂರ್ಣ ಉಪಖಂಡವೇ ಸೂರ್ಯನ ಬೆಳಕಿಲ್ಲ ಕತ್ತಲೆಯಲ್ಲಿ ಮುಳುಗಿತ್ತು ಎನ್ನಲಾಗಿದೆ. ಅಂದರೆ ಒಂದೊಮ್ಮೆ ಯೋಚಿಸಿ ಅಷ್ಟು ಸಾವಿರ ವರ್ಷಗಳ ಹಿಂದೆ ಜಗತ್ತು ಹಾಗೂ ಜನರು ಇಂದಿನಂತಿರಲಿಲ್ಲ, ಯಾವ ಸೌಲಭ್ಯಗಳೂ ಇರಲಿಲ್ಲ.
ಅವರ ಜೀವನವೆಲ್ಲ ಸಂಪೂರ್ಣವಾಗಿ ಸೂರ್ಯನ ಬೆಳಕಿನ ಮೇಲೆ ಅವಲಂಬಿತವಾಗಿತ್ತು. ಅಂದರೆ, ಪರಿಸ್ಥಿತಿ ಎಷ್ಟು ಕೆಟ್ಟದಾಗಿತ್ತು ಎಂದರೆ ಸೂರ್ಯನ ಬೆಳಕಿಲ್ಲದೆ ಗಿಡ ಮರಗಳು ಒಣಗಿ, ಸಸ್ಯಾಧಾರಿತ ಪ್ರಾಣಿಗಳು ಊಟ ಸಿಗದೆ ಗತಿಸಿ, ಮಾಂಸಾಹಾರಿಗಳು ಇತರೆ ಜೀವಿಗಳಿಲ್ಲದೆ ಹಾಗೂ ಕೊನೆಯದಾಗಿ ಮಾನವನಿಗೆ ಯಾವ ಆಹಾರವೂ ಇಲ್ಲದಂತಹ ಪರಿಸ್ಥಿತಿಯನ್ನು ಅದು ನಿರ್ಮಾಣ ಮಾಡಿತ್ತು. ಈ ಕಾಲ ಹೇಗೋ ಗತಿಸಿ ಹೋಗಿದ್ದು ಹಾಗೂ ಮಾನವನ ನಿರ್ನಾಮ ಆಗದೆ ಇದ್ದದ್ದು ಅದೃಷ್ಟ.
ಆದಾಗ್ಯೂ ಇದೇ ಇಂಡೋನೇಷಿಯಾದಲ್ಲಿ ೧೮೧೫ ತಂಬೋರಾ ಎಂಬ ಜ್ವಾಲಾಮುಖಿ ಸ್ಫೋಟಿಸಿದಾಗ ಭಾರತದಲ್ಲಿ ಒಂದು ವರ್ಷಗಳ ಕಾಲ ಬೇಸಿಗೆಯೇ ಬಂದಿರಲಿಲ್ಲ ಎಂದು ಹೇಳಲಾಗುತ್ತದೆ. ಹಾಗೆ ನೋಡಿದರೆ ಇವೆಲ್ಲ ಚಿಕ್ಕ ಜ್ವಾಲಾಮುಖಿಗಳಷ್ಟೆ, ಆದಾಗ್ಯೂ ಅವು ಭಯಾನಕ ಆತಂಕವನ್ನು ಸೃಷ್ಟಿ ಮಾಡಿದ್ದವು.
ಈಗ ಸ್ಫೋಟಗೊಂಡಿರುವ ಇಥಿಯೋಪಿಯಾದ ಜ್ವಾಲಾಮುಖಿಯಿಂದಾದ ಬೂದಿಮೋಡಗಳು ಅಷ್ಟು ದೊಡ್ಡ ಪ್ರಮಾಣದಲ್ಲಿಲ್ಲ ಹಾಗೂ ಅದಾಗಲೇ ಇವು ಈಗ ಭಾರತವನ್ನು ಸಹ ದಾಟಿ ಚೀನಾದ ಬಳಿ ಸಾಗಿರಬಹುದು, ಅಲ್ಲದೆ ಇದು ಯಾವ ಗಂಭೀರ ಅಪಾಯವನ್ನು ಸದ್ಯಕ್ಕೆ ತಂದೊಡ್ಡಿಲ್ಲ.