ಬಾಯಲ್ಲಿ ನೀರೂರಿಸುವ ಲಿಂಬೆಕಾಯಿ ಉಪ್ಪಿನಕಾಯಿ ಎಂದರೆ ಯಾರಿಗೆ ತಾನೆ ಇಷ್ಟ ಆಗಲ್ಲ…ಅಬ್ಬಾ ನೆನೆಸಿಕೊಂಡರೇನೇ ಬಾಯಲ್ಲಿ ಉಪ್ಪುಪ್ಪು ನೀರು ಜಿನುಗುತ್ತದೆ ಹಲವರಿಗೆ. ನಮ್ಮ ಭಾರತೀಯರಿಗಂತೂ ಊಟದಲ್ಲಿ ಉಪ್ಪಿನಕಾಯಿ ಇರಲಿಲ್ಲವೆಂದರೆ ಆ ಊಟ ಅಪೂರ್ಣವೇ ಸರಿ.
ಉಪ್ಪಿನಕಾಯಿಗಳಲ್ಲಿ ಸಾಕಷ್ಟು ವಿಧಗಳಿವೆ. ನಮ್ಮ ಆರೋಗ್ಯಕ್ಕೆ ಉತ್ತಮವಾಗಿರುವ ಹಲವಾರು ಕಾಯಿಗಳಿಂದ ಉಪ್ಪಿನ ಕಾಯಿ ತಯಾರಿಸಬಹುದು. ಕೇವಲ ಭಾರತವಲ್ಲದೆ ಜಗತ್ತಿನಾದ್ಯಂತ ವಿವಿಧ ರೀತಿಯ ಉಪ್ಪಿನಕಾಯಿಗಳು ಬಳಕೆಯಲ್ಲಿವೆ.
ಉಪ್ಪಿನಕಾಯಿಗಳ ಇನ್ನೊಂದು ವಿಶೇಷತೆ ಎಂದರೆ ಅವುಗಳಿಂದ ದೊರೆಯುವ ಆರೋಗ್ಯ ಪ್ರಯೋಜನಗಳು. ಹೌದು, ಉಪ್ಪಿನಕಾಯಿಗಳು ಸಾಮಾನ್ಯವಾಗಿ ಪ್ರೊಬಯಾಟಿಕ್ ಆಹಾರ ಪದಾರ್ಥಗಳಾಗಿದ್ದು ನಮ್ಮ ಆರೋಗ್ಯಕ್ಕೆ ತುಂಬಾನೆ ಲಾಭಗಳ್ಳನ್ನು ಒದಗಿಸುತ್ತದೆ.
ಈ ಪ್ರೊಬಯಾಟಿಕ್ ಆಹಾರಗಳು ಮುಖ್ಯವಾಗಿ ನಮ್ಮ ಗಟ್ ಆರೋಗ್ಯಕ್ಕೆ ಬಲು ಮ್ಯುಖ್ಯ. ಈ ಗಟ್ ಆರೋಗ್ಯ ಎಂಬುದು ವ್ಯಕ್ತಿಯ ಶರೀರದ ಒಟ್ಟಾರೆ ಕಸುವು ಹಾಗೂ ಸಾಮರ್ಥ್ಯವನ್ನು ಪ್ರತಿನಿಧಿಸುತ್ತದೆ. ಅಂದ್ರೆ ನಮ್ಮ ಗಟ್ ಆರೋಗ್ಯ ಎಷ್ಟು ಚೆನ್ನಾಗಿರುತ್ತದೆಯೋ ಅಷ್ಟು ನಾವು ಯಾವುದೇ ಕಾಯಿಲೆಗಳಿಗೆ ಒಳಗಾಗದೆ ಶಕ್ತಿಯಿಂದಿರುತ್ತೇವೆ. ಒಂದು ರೀತಿಯಲ್ಲಿ ನಮ್ಮ ಪ್ರತಿರೋಧಕ ಶಕ್ತಿ ಇದ್ದಂತೆ.
ಇನ್ನು ಉಪ್ಪಿನಕಾಯಿಗಳು ಅತ್ಯುತ್ತಮವಾದ ಪ್ರೊಬಯಾಟಿಕ್ ಆಹಾರ ಪದಾರ್ಥಗಳಾಗಿದ್ದು ನಮ್ಮ ಗಟ್ ಆರೋಗ್ಯ ಸುಧಾರಿಸುವಲ್ಲಿ ಸಾಕಷ್ಟು ಪ್ರಮುಖ ಪಾತ್ರವಹಿಸುತ್ತವೆ ಎನ್ನಬಹುದು. ಬನ್ನಿ ಈ ಲೇಖನದಲ್ಲಿ ನಾವೀಗ ಎಣ್ಣೆ ಬಳಸದೆಯೆ ಲಿಂಬೆಕಾಯಿ ಉಪ್ಪಿನಕಾಯಿಯನ್ನು ಮನೆಯಲ್ಲೇ ರುಚಿ ಶುಚಿಯಾಗಿ ತಯಾರಿಸುವುದು ಹೇಗೆ ಅಂತ ತಿಳಿಯೋಣ.
Credit: Chrystledsouza Wiki Commons
ಬೇಕಾಗುವ ಪದಾರ್ಥಗಳು
ರಸಭರಿತ ಲಿಂಬೆಕಾಯಿಗಳು – 30
ಸಾಸಿವೆ – ಅರ್ಧ ಚಮಚ (ಪುಡಿ ಮಾಡಿದ್ದು)
ಮೆಂತ್ಯೆ ಕಾಳು – ಎರಡು ಚಮಚಗಳಷ್ಟು
ಉಪ್ಪು (ಸಾಧ್ಯವಾದರೆ ಹರಳುಪ್ಪನ್ನು ಮಿಕ್ಸಿಯಲ್ಲಿ ಹಾಕಿ ಪುಡಿ ಮಾಡಿ) – ರುಚಿಗೆ ತಕ್ಕಷ್ಟು
ಖಾರದ ಪುಡಿ – 30-50 ಗ್ರಾಂಗಳಷ್ಟು
ಹಿಂಗು/ಇಂಗು – ನಿಮಗೆ ಅದ್ಭುತವಾಗಿ ಪರಿಮಳ ಬರುವಷ್ಟು (ಒಂದು ಚಿಕ್ಕ ಡಬ್ಬಿ)
ಸಕ್ಕರೆ – 50 ಗ್ರಾಂ
ಅರಿಷಿಣ – ಸ್ವಲ್ಪ
ಮಾಡುವ ವಿಧಾನ:
* ಮೊದಲಿಗೆ ಲಿಂಬೆಕಾಯಿಗಳನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದು ಆರಲು ಬಿಡಿ.
* ಚೆನ್ನಾಗಿ ಒಣಗಿದ ಲಿಂಬೆಕಾಯಿಗಳನ್ನು ನಿಮಗೆ ಬೇಕಾಗುವ ಆಕಾರಗಳಲ್ಲಿ ಕತ್ತರಿಸಿಕೊಳ್ಳಿ, ಚಿಕ್ಕ ಗಾತ್ರದ್ದಾಗಿದ್ದರೆ ಒಂದು ಲಿಂಬೆಕಾಯಿಯನ್ನು ನಾಲ್ಕು ಹೋಳುಗಳಾಗಿ ಕತ್ತರಿಸಿಕೊಳ್ಳಿ
* ಹೀಗೆ ಕತ್ತರಿಸಿದ ಲಿಂಬೆ ಹೋಳುಗಳ ಮೇಲೆ ಈಗ ಒಂದೊಂದಾಗಿ ಮೇಲಿನ ಎಲ್ಲ ಪದಾರ್ಥಗಳನ್ನು ಹಾಕುತ್ತ ಚೆನ್ನಾ ಕಲಿಸುತ್ತಿರಿ
* ಉಪ್ಪನ್ನು ಹಾಕಿರುವುದರಿಂದ ಲಿಂಬೆ ಹೋಳುಗಳು ಸಮಯ ಕಳೆದಂತೆ ಚೆನ್ನಾಗಿ ನೀರು ಬಿಟ್ಟುಕೊಳ್ಳುತ್ತವೆ.
* ನಿಮಗೆ ಹೆಚ್ಚಿನ ರಸಮಯವಾದ ಉಪ್ಪಿನಕಾಯಿ ಬೇಕಿದ್ದರೆ 8-10 ಲಿಂಬೆಹಣ್ಣಿನ ರಸವನ್ನು ಸಹ ಅದಕ್ಕೆ ಸೇರಿಸಬಹುದು. ಈ ಸಂದರ್ಭದಲ್ಲಿ ನಿಮಗೆ ರುಚಿ ಸರಿಯಾಗಿದೆಯೇ ಎಂಬುದನ್ನು ಪರಿಶೀಲಿಸಬಹುದು. ಉಪ್ಪು ಅಥವಾ ಸಕ್ಕರೆ ಬೇಕಿದ್ದರೆ ಇದೆ ಸಮಯದಲ್ಲಿ ಸೇರಿಸಿಕೊಳ್ಳಿ.
* ಈಗ ನಿಮ್ಮ ಉಪ್ಪಿನಕಾಯಿ ರೆಡಿಯಾಗಿದೆ. ಹೀಗೆ ತಯಾರಿಸಿಯಾದ ಉಪ್ಪಿನಕಾಯಿಯನ್ನು ಗಾಳಿಯಾದ ಭರಣಿಯಲ್ಲಿ ಹಾಕಿ ಅವು ಚೆನ್ನಾಗಿ ಕಳೆಯಲು ಬಿಡಿ. ಕೆಲ ದಿನಗಳ ನಂತರ ಲಿಂಬೆಯ ಗಡುಸಾದ ತೊಗಟೆಯು ಕಲ್ತು ಮೃದುವಾಗಿರುತ್ತದೆ. ಆಗ ಉಪ್ಪಿನಕಾಯಿ ಸವಿಯಲು ಸಿದ್ಧವೆಂದು ತಿಳಿಯಬಹುದು.
ಬಾಯಲ್ಲಿ ನೀರೂರಿಸುವ ಲಿಂಬೆಕಾಯಿ ಉಪ್ಪಿನಕಾಯಿ ಯಿಂದ ದೊರೆಯುವ ಆರೋಗ್ಯ ಪ್ರಯೋಜನಗಳು
* ವೈಟಮಿನ್ ಸಿ ಎಂಬುದು ಮಾನವ ಶರಿರದಲ್ಲಿ ರೋಗ ನಿರೋಧಕ ಶಕ್ತಿ ವೃದ್ಧಿಗೆ ಸಹಕರಿಸುತ್ತದೆ ಎಂಬುದು ಎಲ್ಲರಿಗೂ ಗೊತ್ತಿರುವ ವಿಚಾರ. ಅಂತಹ ವಿಟಮಿನ್ ಸಿಯು ಲಿಂಬೆಕಾಯಿಗಳಲ್ಲಿ ಹೇರಳವಾಗಿರುತ್ತದೆ. ಲಿಂಬೆಕಾಯಿ ಉಪ್ಪಿನಕಾಯಿ ಸೇವನೆಯಿಂದ ನಾವು ಉತ್ತಮವಾಗಿ ಸಿ ಜೀವಸತ್ವವನ್ನು ಪಡೆಯಬಹುದು.
* ಉಪ್ಪಿನಕಾಯಿ ತಯಾರಿಸುವಾಗ ಬಳಸಲ್ಪಡುವ ಇತರೆ ಪದಾರ್ಥಗಳೂ ಸಹ ತಮ್ಮದೆ ಆದ ಆರೋಗ್ಯ ಲಾಭಗಳನ್ನು ಹೊಂದಿವೆ. ಉದಾಹರಣೆಗೆ ಸಾಸಿವೆ ಕಾಳುಗಳು ಆಂಟಿ ಆಕ್ಸಿಡೆಂಟ್ ಗಳಿಂದ ಸಮೃದ್ಧವಾಗಿದ್ದು ದೇಹದ ಪಚನ ಕ್ರಿಯೆಯು ಸರಾಗವಾಗಿ ನಡೆಯಲು ಸಹಕರಿಸುತ್ತದೆ.
* ಲಿಂಬೆಕಾಯಿ ಉಪ್ಪಿನಕಾಯಿಯಲ್ಲಿ ಬಳಸಲಾಗುವ ಅರಿಷಿಣವು ಊರಿಯುತ ಶಮನಕಾರಿ ಗುಣ ಹೊಂದಿದ್ದು ದೇಹದ ಉರಿಯೂತವನ್ನು ತಗ್ಗಿಸುವಲ್ಲಿ ಸಹಕರಿಸುತ್ತದೆ. ಹಿಂಗು/ಇಂಗು ಜೀರ್ಣಕ್ರಿಯೆಯನ್ನು ಇನ್ನಷ್ಟು ಸುಧಾರಿಸುವಲ್ಲಿ ನೆರವು ನೀಡುತ್ತದೆ.
* ಉಪ್ಪಿನಕಾಯಿ ಒಂದು ಫರ್ಮೆಂಟೆಡ್ ಅಂದರೆ ಹುದುಗಿದ ಖಾದ್ಯವಾಗಿದ್ದು ಪ್ರೊಬಯಾಟಿಕ್ ತತ್ವಗಳನ್ನು ಹೊಂದಿದೆ. ಅಂದರೆ ಇದರಲ್ಲಿ ದೇಹಕ್ಕೆ ಬೇಕಾದ ಅಥವಾ ಶರೀರ ಸ್ನೇಹಿಯಾದ ಸೂಕ್ಷ್ಮಜೀವಿಗಳು ಹೇರಳವಾಗಿದ್ದು ಇವು ನಮ್ ಗಟ್ ಆರೋಗ್ಯವನ್ನು ಸದೃಢಗೊಳಿಸುವಲ್ಲಿ ಮಹತ್ತರ ಪಾತ್ರವಹಿಸುತ್ತದೆ.